Ik weet niet hoevölle kilometer zelfsturende auto’s al zonder chauffeur oaver ’s werelds weang erene hebt, mar det is vaste zovölle det íen ongeval eigenlijk heel weinig is. Al hillemoal as ie het vergeliekt met hoevölle ongevallen d’r geböart met auto’s die döar meansen bestuurd wördt. Denk ik tenminsten, want ok doarvan heb ik de cijfers niet paraat.
Gek is det: heel völle van oons zult niet zo mar in een auto kroepen die van zich zelf ridt. Mar bienoa niemand van oons hef d’r muuite met as de chauffeur twee of drie borrels op hef. En in vakantietied racet wie met sleurhutte en al dwars döar Europa honderden, duzenden kilometers oaver het asfalt, vertrouwend op ons eigen, mar ok op het riegedrag van al die andere weggebrukers…
Wie bent zo bange vöar zelfriedend det as een Uber-taxi een ongeluk krig ömdet iemand anders gin vöarrang gif, det wie het dan logisch vindt det journalisten liegt det Uber met zelfsturende auto’s stopt, terwijl Uber het zelf riene allenig mar ea’m opschort. #nepneejs, #subjectief.
Ooit bedacht det het vliegtuug woar ie misschien wel iens met op vakantie ewest bent, nog wel een piloot an board hef, mar det die allenig mar de automatische piloot een bittie in de gaten hölt? Zelfs het landen giet op de automatische piloot. Zelfsturing.
Mar het mooiste vergeliek tussen zelf doene of het an de machine oaverloaten kwam op die verjoardag van een man an de toafel van de echt oale luu: “ik weet nog goed det de spoarbomen automatisch wönn. De spoarwachter vreug of ik det wel veilig vund. Ik heb hem ezegd det ik doar mear vertrouwen in hadde dan det hij het mos doene.”
Het zetten mie an het denken. Wie vertrouwt de spoarbomen, wie eist zelfs spoarbomen bie een onbewaakte oavergang as twee meansen per joar niet goed uutkiekt.
En verkearslichten? Gruun is gruun. Gin meanse die det in twiefel trekt. Mar zelfriedende auto’s. Oei wat eng.
Denne van Knöldert
Meer foto's