Home / archiefcentraal / denne communicatie

denne communicatie

Ie goat as burger an det loket stoane en as ambtenaar help ik oe dan wannear det zo uutkump. Denk an de beperkte openingstieden, hoal mien pauzes in de gaten en ie kriegt binnen zes wekken antwoard.

Is ‘ambtenarenloket’ niet völle mooier? Det is een loket woar een ambtenaar noar toe mut as d’r een burger is met vroang. Altied open, gin pauzes en direct antwoard.

Det is het verschil in zenden en ontvangen. De communicator hef iets te zenden, mar mut op de stoel van de ontvanger goan zitten öm te bedenken hoe hij zien bosschop het beste in kan pakken.

Die maniere van denken lear ie op schoele. Op Windesheim bevobbeld. As ie doar een paar joar lesse had hebt, kun ie intern met doene an een bureautje vöar opdrachten uut de praktijk. Onder toeziend oog van schoelmeisters een bittie probearen.

AIDA-communicatie heet det bureau, leas ik op de algemene Windesheimsite. Mar een linkie noar AIDA werkt niet mear. En het tillefoonnummer det d’r bie stiet, is ok uut de lucht.

Kwestie van communicatie, denk ik. Det krieg ie met studenten. As de ze studiepunten hebt, doet ze de döare achter zich dichte (of loat ‘m gewoon open stoane) en weg is weg.

Het algemene nummer van Windesheim ebeld, dan krieg ie de poartwachters van de schoele, dus die zult hun uuterste best doene mie wieder te helpen. Dame 1 verbindt mie döar noar het informatiebureau, doar komt ze d’r ok achter det de stekker uut de tillefoon is en verbindt ze mie wieders met het servicebureau.

Bie Windesheim hebt ze niet íen burgerloket, zie het d’r wel drie…

Det servicebureau van de opleiding Communicatie had ‘die lui van AIDA’ nog wel zien lopen begin dit schoeljoar. “Maar daarna niet meer. Ik zal eens navragen…” 

Ik blief keurig an de lijn, mar noa 8:21 minuten verbrekt de verbinding.

Denne van Knöldert

Lees ook

Het levenswerk van Frits Offenberg

Raaltenaar al vele jaren bezig om volledige geschiedenis van gemeente Raalte en inwoners te documenteren …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.