In de joaren vieftig trök ’n oalen Westenenk as een soart van economisch vluchteling, op zuuk noar geluk, noar Canada. Net as Vosman. Beiden waren ze ‘etrouwd met een Nieboer. Een andere Nieboer trouwen met Heethaar. Met iene doarvan ben ik etrouwd. Logisch toch det wie de Canadezen op de koffie evroagd haa’n toen ze in Nederland waa’n?
Ik had mie wat vöarbereid op de oaverienkomsten en verschillen met doar en hier. Wie wult minder vluchtelingen. Doar smeekt vriewilligers öm mear vluchtelingen. Bie oons wördt wietplantages op’erold, hullie goat het legalisearen. Dus ik zegge: “as Wilders hier de baas wördt…” en zie vullen an met “dan kom ie toch noar Canada? Welcome!”
Grote verschillen: ik kreeg van de wekke een folder van de gemeente in de busse met ‘wie wult oe niet bange maken’ op de vöarkante, met binnenin ollemoal bangmakende tips oaver de döare op slot doene en zo. In Canada doet ze de döare van het huus niet iens op slot as ze noar hun werk goat. Ok niet in een stad as Toronto. Wrum niet? “Wrum wel! As ie d’r vöar zörgt det iederiene het goed hef, hoef niemand te stellen. Toch?”
Kleine verschillen: ule schenkt hier earst koffie en doarnoa een borrel as d’r bezuuk kump. Wie begint met een borrel. Völle gezelliger. En öm wear sober te wönn, nemt wie koffie noa. En wie doet de schoene uut as wie een huus in goat. Ok as wie op bezuuk bent! Ule hebt de hele dag de schoene an…
Oaverienkomsten: John Westenenk zag zien Nederlandse nea’m en nichten vöar de derde kear in zien lea’m. Wat mie opveul was det hij knipogen as e een grappie maken, mar doar serieus bie bleef kieken. Det dut zien familie hier in Nederland krek geliek. Genetisch bepaald vermoedelijk.
Wat is het toch mooi öm af en toe ok ‘ns te kieken hoe ze dinge een anderweg doet. Ter leringh ende vermaeck.
Denne van Knöldert
Meer foto's