Home / archiefcentraal / denne brommert kwiet

denne brommert kwiet

Met het bestellen was de servearster wat ofwezig. Ik zeg teeng mien vrouw: “Die is met de kop minder anwezig dan met de konte”, wat bienoa de sfeer verpest had, as doar niet net een paar parkearwachten binnen kwamen lopen.

Onze servearster lea’m op. ‘Eindelijk’, zei ze en leup linea recta saams met de snorremansen in stoer pak noar die scooter. Die bleek verkeard geparkeard te stoane. Niks nie gezellig druk binnen, gewoon dom vöar de döare zet döar een Sjonnie.

Wat mie toen vöar een vremde bureaucratie an de oong ontrollen…

Earst schreef snorremans een briefie en plakken die op de scooter. Mar noa tien minuten en twee koppen koffie verder was de eigenaar nog niet terugge. Dus kwam het zwoardere geschut. Zie reupen een wegslep-auto op.

Dan denk ie an een bussie woar ie die scooter achterin drukt. Mar d’r kwam een vrachtwagen woar de busse noar Zwolle wel achterop kon. Det gaf nog een mooi schouwspel. Die wegsleppert mos dreien op de weg. Die weg was druk. En de schemer veul in. Dus files vöar en achter, terwijl de oranje zwaailampen steeds mear indruk maken.

Publiek verzekerd.

Noa een kwartier kon de laadkleppe open en werd het scootertie d’r op edrukt. Stund die doar, moederziel allenig op zo’n groot laaddek. Onder applaus van de mensen op de terrassen in de ömgeving reed de wegslepchauffeur de stroate uut en deud snorremans nog een klop koffie in het restaurant.

Einde scene.

Op wat administratie noa natuurlijk. Want de politie-interventie mut wel goed in de boeken terechte komm’. Onder het kopje van ‘lastige scooter’ of ‘verkeard geparkeard’. Goede registratie is ok van belang vöar as de dader zien scooter wear op kump halen.

Noa al det gedoe ben ik vergetten hoe of det mie het etten ‘esmaakt hef.

Denne van Knöldert

Lees ook

Herinneringswandelroutes in Raalte en Heino in kader van Wereld Alzheimerdag

RAALTE – In het kader van Wereld Alzheimerdag worden in de week van 20 tot …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.