Ik zit in de sauna en luuster mee met een gesprek tussen twee Zwollenaren. Zestigers. Dikboeken. Ik had toch vöar de stilte-sauna mu’nn kiezen, is mien earste gedachte, mar noe ik hier toch benne, kan ik mie d’r ok wel met bemuuien:
“Wulke waarden en normen heb ie dan mu’nn inleaveren?”
“Noa, Zwarte Piet…”
“Nog mear?”
Toen heuld het eigenlijk wel een bittie op. Ik zeg: “Ben ie noe een echte VVD’er? Zwarte Piet as hoogste waarde?
De proatsauna leek een bittie een stiltesauna te wönn.
“Wat bent oe waarden en normen dan?” wol ik van de man weten, die vaste ok wel was goan zweten as e niet in de sauna zat. “Drugsdealers hun criminele geld loaten wiswassen, zoas Teeven deud? Het alcoholslot ofschaffen, wat Schultz van Haegen wul, zodet al die blanke drankrieders hun gang kunt goane?”
“How, how”, zeg e, die drankrieders, det bent Polen.
“Precies, earst uut traditie negers verhandelen die oons helpt landen löag te plunderen, dat Turken en Marokkanen hier hen halen vöar het werk det wie niet wult doene en noe de Polen hier in de bouw loaten werken ömdet det goedkoper is. Ollemoal traditie, ollemoal normen en waarden, det mut wie niet wullen ofschaffen!”
“Eigenlijk hef die man wel geliek”, veul zien vrouw mie bie. “Mut ie toch ‘ns kieken in wat vöar mooi land wie hier leaft. As ik de hond uutloate en ik kiek öm mie hen, wat geböart d’r oaveral dan toch mooie dinge. En eigenlijk doe ie doar hillemoal niet an met.”
“Nou, toch wel”, zei de man “ik betaal belasting!”
Det spöllen zich vriedag in de sauna of. Benieuwd of die beiden verder nog een leuk weekend ehad hebt.
Denne van Knöldert
Meer foto's