Het was half achte det ik ankwam en dan is d’r op zo’n grote schoele nog gin meanse te bekennen. Dus is wol mien dure racefietse snel eam met noar binnen nemmen, onder de douche springen, nog wat van mien bureau pakken en dan wear vot, noar ‘die dislocatie’, zoas det heet. Mar de conciërge was d’r al wel op det vrogge tiedstip en van hem moch de fietse niet met noar binnen: “Stel voor det iedereen dat gaat doen.”
Ik heb det geprobeard mar het lukken niet. Zelfs as det zol meu’ng, kon ik mie niet vöarstellen det iederiene de fietse met nam noar binnen. Wat een gekkigheid. Wat ik mie wél kon vöarstellen is een vergadering met van die papierschoevers oaver de regel: “öm te vöarko’mm det iederiene zien fietse met noar het bureau nemt, verbiedt wule det iemand zien fietse met noar binnen nemt.”
Nog een geval van niet neudig: In Utrecht kwam ik een stoer informatiebörd teeng det zei det ze ter plekke het verkearslicht uut ezet haa’n in verband met een proef onneudige verkearslichten ok echt te verwijderen. Kennelijk hef de gemeente Utrecht papierschoevers in dienst met de neiging onneudige verkearslichten near te zetten.
Ok niet neudig: Ik höaren van een schoelhoofd die zien meesters verboden had een korte broeken te draa’ng op het werk, “want ie mut netties vöar de klasse stoane”. Een korte broek is dus niet netties? En al het andere dus wel? Ik zol bierboeken; slechte make-up, goedkope Makro-pakken en geverfd hoar dan earder verbieden.
De hoofdvroage is natuurlijk niet wat netties is, de hoofdvroage is hoe ie het beste lesse geeft. As ie doar oe personeel op ofrekkent, kös de docent as onderdeel van zien professionaliteit zelf wel wulke kleare doar bie höart. Mar ja, dan mut ie wel verantwoardelijkheid bie een aander nearle’ng.
Det is pas lef he’mm: een eindverantwoardelijke die zien meansen optimaal verantwoardelijk maakt. Det durft regelgevers niet, mar det leavert wel het beste resultaat!
Denne van Knöldert
Meer foto's
