Home / archiefcentraal / denne kat en moes

denne kat en moes

In ieder huusholden zie ik det wel terugge. Doar woar ze d’r een hond of een katte bie hebt, hef zo’n beest altied een hele hoop in de melk te brokkelen. Hamsters en cavia’s bent nog erger, want die wördt beheard döar dochterlief en die oogappel, die gun ie alles!

Wie hebt thuus een klein vijvertie. Met een paar mooie goldvissen d’r in. Noe was lest de katte die vissen wat an het ploa’ng. Althans, zo ömschreef mien dochter det. Volgens mie wol de katte de vissen gewoon opvretten, mar “det dut onze Dikke niet!” wus dochterlief zeker. Toen een dag later een reiger an de rand van de vijver zien servetje al vast goed trök vöar een lekker goldvissie as lunch, jaa’ng mien dochter ‘m weg. Ik zeg: “die is allenig de vissen mar wat an het ploa’ng.”

Zo plög onze katte ok altijd moezen. En hij vret ze op. Af en toe zagen wie Dikkie met zo’n moes in de bek richting huus lopen. Het kattenloek ging dan subiet op slot, kat en moes mossen zich dan buten mar wieders vermaken. De wichter konn’ doar dan zo tien minuten noar kieken. “Omdet det zo mooi is!”

Mar as wie een moes in huus hebt, dan mag ik hem niet vangen met een klemme. “Zielig”, is de teneur, dus hebbe wie van die kooitjes woarin wie de moes vangt. As de moes lekker an zien kaas knabbelt, valt achter hem de toegang dichte. Lekker de moes een bittie ploa’ng… Het beessie wördt dan buten lös ‘eloaten, woarnoa e – zag ik op internet – vrolijk wear terugge löp noar zien hollegie bie mie in een aanrechtkassie.

Mollen, die mag ik wel vangen met een klemme. Hef iets met de aaibaarheidsfactor te maken.

De katte is niet mear. En sindsdien hebt wie ok gin moezen mear. Wat mie vöar een roadsel stelt. Ik dach altied det een katte in huus, de moezen buten heult. Mar met katte haa’n wie geregeld moezen in huus. Zonder katte niet mear.

Denne van Knöldert

Lees ook

Muziekbokaal voor gemeenten en Stichting Muziek Netwerk Salland

WIJHE – De gemeenten Raalte en Olst-Wijhe hebben voor hun inzet voor het muziekonderwijs op …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.