De sportzommer is in völle opzichten anders. Zo was Nederland niet op het EK. Det gaf mie een heel andere beleaving. Ik kon met minder emotie noar wedstrijden kieken en kwam d’r achter det voetballen eigenlijk een saai spel is. En det de voetbalwereld geregeard wördt döar aartsconservatieven die niet van plan bent te learen van andere sporten en deskundigen uut andere werelden.
Van de NOS mos ik fan van België weane, det kump umdet ze in Amsterdam en Hilversum mear met België hebt dan met Duutsland. Van de NOS mos ik ok die goal van Ronaldo mooi vinn’, mar het publiek stemm’ det hakkie achter het standbeen steeds wear weg uut de EK-top 5. Wegens een hekel an die ansteller.
Die goal, die Ronaldo, ik vinn det een mooi vöarbeeld van hoe die programmamakers de binding met de werkelijkheid kwiet bent, Henry Schut en Hugo Borst snapt mar niet det het publiek wat anders wull dan det zie denkt.
Die misvatting giet ok op vöar commentatoren. Die schreeuwt as imbicielen bie een mooie goal. Ömdet die mooie goal iedere kear herhaald wördt, höare wie det geschreeuw ok iedere kear terugge. Op ienig moment bent die commentatoren goan denken det die herhalingen niet vanwege de goal kwam, mar vanwege het geschreeuw.
Det hef zien eigenste dimensie ‘ekreeng. In Hilversum denkt ze noe ok det wie det geschreeuw mooi vindt in plaatsen van de voetbalactie. Gevolg is det het geschreeuw herhaald wördt met de commentator in beeld, in plaatsen van de voetbalactie met het geluud iets zachter.
Mart Smeets hef detzelfde met emaakt. Smeets was een goeje presentator. Zien programma’s hadden anzien vanwege de goeje gasten en de inhold van de gesprekken. Mar op ienig moment is Smeets goan denken det wie hém goed vunn’, dus had e op ’t laatst allenig nog mar gasten vöar stoelvulling.
Noe het EK vöarbie is en de Avondetappe wieders giet, kunt wie genieten van goede gesprekken, analyses en geestdrift van de gasten an toafel. Van Rob Harmelink en Danny Nelissen. En ja, vöar zo’n programma heb ie presentatoren neudig. In die volgorde.
Denne van Knöldert
Meer foto's