Vermoedelijk hebbe wie toen gewoon oaver zandpaden efietst.
De barre tocht is ontstoane toen drie Heetenaren zich evestigd hadden in Rotterdam en op een oamd noar de kroeg wollen. Dan goa ie met de fietse. En een goeie kroeg: dan mut ie noar Bosgoed in Heeten…
Ok Bosgoed is niet mear.
Onderweg op die kleine 200 kilometer werkt wie an een puntenklassement van deelnemmers uut Rotterdam teeng Salland: ieder dorp of buurtschap met een plaatsnaambörd is een tussensprint. De havenarbeiders teeng de boeren.
Toen wie bie Epe langs een gierende boer kwamen zei zo’n bootwerker nog: ‘ik denke det wie d’r noe wel bienoa bent.’
Het ging ok oaver FC Twente. Want in ’t westen denkt ze det PEC, Eagles, Heracles en Twente net zo bie mekare lig as Feyenoord, Sparta en Excelsior. Wat ik doar van vunne. Noa det vertel ik graag:
Ik vind det de tukker niet bestraft mut wönn vöar witte boardencriminaliteit van bestuurders. Det Twente in de eredivisie mag blie’m vind ik döarumme wel goed. As straks die bestuurders mar wel vöar de rechter komt!
Ik mos mien verhaal in tweeën knippen want wie mossen tussendöar ea’m sprinten vöar Bunnik.
Ok qua rechtspraak vind ik het ollemoal kloppen. De licentiecommissie kwam töt degradearen umdet d’r uut neej onderzuuk neeje feiten kwamen. De beroepscommissie vund det die neeje feiten niet mee mochen tellen in de beoardeling, doodeenvoudig ömdet det oale lieken in de kaste bleken en op toafel kwamen ömdet FC Twente ongevroagd zelf onderzuuk in’esteld had.
‘En die uutspraak van de rechter dan’, wol een Sparta-supporter weten (die denk ik dach det zien club volgend joar mear kans teeng de Graafschap zol he’mm). Nou, die rechter was niet evroagd of Twente mog degradearen, de rechter hef allenig mar onderzöcht of de licentiecommissie gerechtigd was zo’n degradatie-beslissing te ne’mm!
Ik geef toe, as ie an het wielrennen bent kom ie met zo’n uutleg snel achter adem, vöaral as ie dan net bie de Apenheul een bult oaver mut.
Mar gelukkig waren wie dertig joar elene al dertig joar oald, dus hoale wie noe op zo’n tocht wat vaker een plaspauze.
Denne van Knöldert
Meer foto's