Home / archiefcentraal / denne van knoldert niet op het ek

denne van knoldert niet op het ek

Det wus ze ok niet precies.
“D’r bent in de lente toch altied finales?”

Ik heb eam diepe noa edacht. Woar zol ik beginnen met uutleng. Bie het verschil tussen competities en bekervoetbal? Bie de landelijke beker, de UEFAcup en de Championsleage? Mar det had ik al een kear uut elegd. Al wel zes kear eigenlijk. De leste kear nog toen ik noar Groningen – PEC in de Kuip was ewest.

Ik kon ok de trainers van De Graafschap en Ajax citearen die in meart al zei’en det het vanof noe allenig nog mar mear finales waren. De Graafschap öm in de eredivisie te blie’m. Ajax öm kampioen te wönn. Beiden falen in hun laatste finale.

Op de ien of andere maniere vulen ik an det ik det ollemoal better mar niet kon uutleng. Mar het leek mie earder verwarring op te leaveren dan dudelijkheid. Ik zei: “Nee, det was gin finale die ik an het kieken was, det was Zwitserland teeng Albanië.”
“Leuk?”
“Spannend, hard en opvallend. Twee kear twee bröars die teeng mekare voetballen.”
“Was ien van die beiden verkocht dan?”

(De vrouwen bent bie ons thuus in de mearderheid. RTL8 en Kitchen24 stiet völle op. Voetbal niet zo vake. Döarumme hebbe wie twee tillevisies.)

Ik zeg: “Landenteams kunt niet kopen. Mar d’r bent völle Albanezen evlucht. Die hebt in hun neeje land twee paspoarten. Die Marokkanen met die grote auto’s hier, die hebt ok twee paspoarten. Hakim Zyjech bevobbeld. Die voetbalt noe vöar Marokko.”

“Wul ie nog een köppie thee?”

 Bie die vroage beseffen ik det haar gedachten ergens halverwege mien uutleg weg edwaald waren. Terwijl zie thee zetten keek ik snel de leste minuten van de earste helft van Turkije – Polen, mar ik zat ok nog met det ‘wannear begint de WK’ in mien mage. Zol ik nog een poging doene uut te leng det d’r op dit moment een EK gangs is?

Ik ben d’r uuteindelijk niet an begunn’, want toen ze de thee inschunk vreug ze: “en wannear mut Nederland voetballen?”

Denne van Knöldert

Lees ook

Dorpsquiz brengt jubilerend Hoonhorst in beweging

Op zondagmiddag 14 november vindt de ‘eerste echte Dorpsquiz Hoonhorst’ plaats HOONHORST – Het had …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.