Nem de Sallandse tentfeesten. Die dreijt op drankömzet. Hoe mear bier, hoe better vöar de kas. Op Dauwpop kossen een pilsje 2,50, een flessie water 3,75! Op Dauwpop haa’n ze trouwens ok een speciale kroam vöar sigaretten en in de Ribs and Blues tente (die ¾ dichte was wegens de koale) was gin rookverbod.
Ofgelopen wekke hebt de boeren hun maïs goed in de gif ezet zodet d’r gin onkruud opkump. Menig oprit is met roundup wear vlekkeloos schoon emaakt.
Alle etten wat in de supermarkt in een pakkie zit hef völ te völle zolt in zich, mar het voedingscentrum wul De Unilevers van disse wereld niet dwingen minder toe te voegen.
Wie d’r klaagt oaver E-nummers is gek. Wifi is hillemoal niet gevoarlijk, loop toch niet zo te zöaren. En vrouw’n an de raw-food, det zult wel heks’n weane.
Drugs hebt wie verboden in dit land, det leavert vöaral völle politiewerk op. Mar de supermarkt mag stunten met drank. En wat sterkers is op de hoek van de stroate ok te krieng. Een rookverbod in het café werd weg ehoond en ie bent as older pas stoer as ie oe wichter wél drank geeft vöar det ze 18e bent.
Autocross, oldtimertoertochten, shows met oale trekkers, det kan mear bieval verwachten dan het plan brandstof-auto’s uut te bannen.
En natuurlijk wulle wie met kerstmis sloa bie het diner en loat wie de rozen uut Afrika anvlieng ömdet wie hier niet zo völle gif op die bloemen meung spuiten.
Intussen zamelt wie geld in, met ollemoal hetzelfde t-shirt an woar – nem ik zo mar – niks te völle per stuk vöar is betaald, want det zol ollemoal ten koste van de opbrengst goane. Det d’r in Pakistan 10 joarige kinderen an werkt met werkdage van 12 tut 14 uur, det de mooie poarse kleur ergens in India alle vissen in een plaatselijke rivier edood hef… Tja.
Ik hoppe det d’r heel gauw een middel teeng kanker e’vunn wördt. En ik hop ok det wie heel snel iets goat doene an het verkommen d’r van.
Denne van Knöldert.
Meer foto's