Een paar moand terugge
“Ie bent zeker zo’n succes-fan’”zei mien collega in een sollicitatiegesprek woarin wie d’r iene an wollen nemmen die vöar PEC Zwolle was. Mien collega is Eaglesfan, dus dan ben ie al gauw jaloers as een andere club goeje resultaten nearzet.
“Nou nee”, zei de sollicitant, “ik ben eigenlijk al sinds joar en dag fan.”
“En wrum heb ie dan gin vaantie in oe auto hangen?”
Mien collega had zien huuswerk goed edoane. Hij had de sollicitant op LinkedIn opezöcht, las doar oaver zien PEC-fanschap en had de secretaresse kort vöar het gesprek de sollicitant koffie an loaten bieden. Kon hij gauw eam op de parkearplaatse in de auto van de wellicht neeje collega kieken.
Wrum of e gin vlaggetjes van PEC in e auto had hangen.
“Nou, öm earlijk te weane, die heb ik d’r anders altied wel in hangen, mar ik had op Facebook ezene hoe grote Eaglesfan ie bent, dus leek het mie verstandig ze d’r vandage eam uut te halen!”
Ofgelopen zundag
Ik bekiek die foto nog iens wat better. Wat een bliedschap kan iene dan nog in zien gezichte he’mm. Zo’n intense glimlach zie ie zelden. En wat d’r mear van is: het is gin selfie. Hij hef iemand anders dus evroagd die foto te maken. Compleet de schaamte vöarbie.
Kommend seizoen
Bie PSV zegt ze det ze superboeren bent, die kunt better mar op zuuk noar een neeje geuzenname. Want kommend seizoen spölt Eagles én PEC Zwolle in de eredivisie. Heracles ok. En vermoedelijk de Graafschap d’r bie. Dan is d’r bienoa ieder weekend wel een derby van de boeren uut het oosten.
Die tussen PEC en de Eagles loopt buten het veld uut de hand. Mar die van de Graafschap en de Eagles zult ok wel fout goane vanwege het gedrag zundag noa ofloop van de Graafschapsupporters.
Ik advisear mien collega zien Eaglesprullaria vöar kommend seizoen uut te breiden met een heui-vörke.
Denne van Knöldert
Meer foto's