De tillefoon deud het niet. Dus bellen ik met Ziggo.
Het antwoardapparaat zei det ik as Ziggoklante gratis kon bellen via de vaste lijn. Mar die vaste tillefoon deud dus niet. Doarnoa kreeg ik te höaren det ik goed op mos letten, want het keuzemenu was veranderd. Asof ik iedere dag met Ziggo belle…
Vervolgens mos ik mien postcode insprekken öm better ‘ehölpen te wö’nn en zie gaa’m een vöarbeeld hoe det mos. Bie 3115AH mos ik eenendertig vijftien Albert Hendrik zeng. Mar ik heb 8102, dus wus ik niet hoe ik die 02 mosse zeng. Drie kear zei het antwoardapparaat det e de postcode niet snappen, woarnoa e mie toch verder leut.
Uuteindelijk kreeg ik een lieftallig meissie met een heel zachte g an de lijn, niet echt uut mien postcodegebied… Woar ik wonen en hoe oald ik wasse. Van det leste heb ik vanwege die sensuele g stiekem tien joar of elöang, woarnoa ik uut le’ng det de gesprekken steeds half weg veulen. “Lastig”, concludearen ze, “dan hoor je steeds maar de helft.”
Duzzz. Ik had d’r toen al niet zo völle vertrouwen mear in det ik die dag de tillefoon nog an de proat zolle krieng.
Ik mosse stekkers uut de tillefoon trekken, rooie knöppies indrukken en dan de stekker d’r wear in, het modem uut en an zetten, de voip-stekker d’r terugge in doene… Ik zegge: “Mar die had ik d’r nog hillemoal niet uut ‘etrökken. “O, dat geeft niks” zei ze. Woarnoa ik mie ofvreug of ze d’r zelf nog wel vetrouwen in had, det det ollemoal goed zol ko’mm. Det had ze, het volste vertrouwen.
“Desnoods sture wie een monteur,” zei ze, “mar earst probeare wie het op disse maniere, want as wie oe niet op kosten hoeft te jaa’ng, dan mutte wie det niet doene natuurlijk.”
Uuteindelijk besleut ze van ofstand in mien modem mee te kieken. “As wie die reset, dan kon het probleem ok wel iens verhölpen ku’nn weane? Mar toen kon ze het modem niet ziene. “Hebt u wel internet?” Jazeker had ik det, “doar heb ik oe tillefoonnummer ‘evunn.
Zie ging ten langen leste toch bie een iets meer deskundige noavroag doene. Öm noa drie minuten en een ‘bedankt vöar het wachten’ wear terugge te ko’mm an de lijn.
Slotconclusie: “Het u eigenlijk wel een tillefooncontract met Ziggo?”
Denne van Knöldert
Meer foto's