Home / archiefcentraal / denne van knoldert bearties

denne van knoldert bearties

Ik stel mie zo vöar det ie met de kammeroaden ergens in november vöar de earste kear bie mekare komt öm een onderwerp vöar op de carnavalswaa’ng te bedenken. Net in die tied was de discussie oaver asielzukers op zien hoogtepunt, dus logisch det ie doar dan iets op bedenkt.

En het mut rijmen.

Oamd an oamd kroep ie bie mekare in de zoepkeet. Iene bedenkt det ‘bestrijden’ en ‘berijden’ op elkare rijmt, en al snel wördt vluchtelingen bestreden en vrouwen bereden.

Noa nog wat bier klinkt det best wel leuk. Vluchtelingen bestrijden, vöardet ze oonze vrouw’n goat berijden. Nog eam opzuken of het bereiden of berijden is, mar die vluchtelingen et gin mensen, dus wördt het een lange ij.

Ie bent zo oavertuugd van oe goeie idee det ie d’r een bittie blind van wördt: ten earste goa ie wennen an de bedachte rijmelarij en ziet niet zo goed mear det het gek is wat ie bedacht hebt. Ten twidde verlies ie het contact met de werkelijkheid: de wereld in oe zoepkeet is een bittie dé wereld.

En dan is het carnaval. De döare van de schure giet open. Oe wereld van de zoepkeet wördt iniens de wereld van de werkelijkheid. Aanderen kiekt met, Aanderen vindt ok wat.

Schrikken…

Heel erg schrikken.

Salland Centraal plaatsen een foto. RTV Oost nam det oaver. En later ok de Stentor. Het AD wol d’r wat met. De Telegraaf. NOS. NRC had moandag ok tekst. Binnen die zoepkeet was de wereld nog wel oaverzichtelijk. Mar doarbuten pröt iederiene zo mar met. Niemand vrög mear wat. Iederiene vindt wat. Bie de NOS was de waang zelfs allenig mar neejs as ze de foto d’r ok bie hadden. Anders niet.

“Het wördt steeds gekker”, höaren ik iene zeng. Mar doar geleuf ik niks van. Ik ben d’r heilig van oavertuugd det spreuken as dissent in het café of op een verjoardagsfeessie an de lopende band te höaren bent. En döarumme vin ik det het verbieden van det soart uutingen verboden mut wönn.

Ie mut het op een andere maniere anpakken. Zoas de vluchtelingen in Ootmarsum. Moslim as ze bent, leupen ze doar met in de katholieke carnavalsoptocht, öm de bevolking te bedanken vöar hun gastvrieheid.

Mien oplossing: zet zo’n vluchtelingengroep in de optocht, gelieke noa de carnavalswaang van de Maester bearties. En dan kieken wie d’r met het applaus giet lopen.

Denne van Knöldert.

Lees ook

Collecties historische publicaties deels samengevoegd

Rijnbrink, Athenaeumbibliotheek en Historisch Centrum Overijssel ondertekenen convenant REGIO – Als geïnteresseerde in historische publicaties …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.