denne van knoldert wildreuster

Ik kan mie nog herinneren det d’r in Deaventer ergens een wildreuster eplaatst was woar ie met de fietse makkelijk onderuut kon goane. Zo’n wildrooster kort vöar of noa een bochte. Leavensgevoarlijk teengswoardig met al die oale luu op elektrische fietsen.

In Deaventer hadden de gewonden geluk. Het reuster was dicht bie het ziekenhuus, dus de scholder was ok zo nog ‘ns kear wear in de kom.

As loper, wandelend en hard, heb ik ok een hekel an die wildreusters. Ik vind het altied nog een heel gepuzzel mien voeten zo near te zetten det ik d’r niet döarhen zakke. Ok met mien moat 46 denk ik gevoar te lopen.

Wildreusters, zie bent d’r vöar öm dieren in een gebied te hoalen. An de diek kom ie ze teeng. In natuurgebied-achtige bossen. Schoapen, koeien as hooglanders, zie goat d’r niet oaver hen. En tegelieke hoef de boer niet iedere kear van de trekker öm een hekke open te doene.

En dan heb ie natuurlijk nog het grote vöardeel vöar de wandelaar. Die kan op plekken kommen die anders heel onhandig te bereiken bent. Ja, ie kunt ok van die opstappen oaver het prikkeldroad maken, mar as ie dan met Kerst met de hele familie goat wandelen, is d’r altied wel iene die niet an de andere kaante kan komm. Dan heb ie zo wear ruzie in de keet.

Vöar fietsers bent die oaverstappen natuurlijk ok niks. Ie ziet op fietspaden döarumme wel iens van die oaverhellende hekwerken die vanzelf wear dichte valt. Probear doar mar iens met oe carbon-fietse van 2500 euro onbeschadigd met an de andere kaante te komm’.

In het land van Daniël (det vrogger het land van Bartje was, mar ik was doar een stuk fietsen langs de dorpen die vöarkomt in het lied ‘wie dud mij wat’) kwam ik de oplossing teeng vöar alle problemen. Met een flink stuk huusvlijt had iemand iezeren schoenzolen op de wildreusters emaakt. Det gaf mie een goed wandelgevuul.

Ik weet allenig niet of schoapen en koeien doar de truc ok van goat döarkriegen.

Denne van Knöldert.

Meer foto's