In juni 2004 zat ik in de Amsterdam Arena en toen e opkwam kreeg ik kippenvel. Nee, het was niet een godenzoon van Ajax, mar David Bowie. Hij klappen d’r gelieke op met de Jean Genie. Met tranen in de oong bellen ik noar huus: öm ze mee te loaten lusteren.
Het was een impulsieve maniere öm wat stoom van de kettel of te bloazen woar mien emoties inzaten. Want mien hele lea’m ben ik Bowiefan. Ik heb een stuk of vieftien, twintig lp’s van hem. Op mien studentenkamer hing die bekende hoes van hem van Aladdin Sane as een schilderieje an de kaante.
En toen kwam vanmonn de app binnen: Bowie overleden. En eam later: andere media zegt het noe ok, dus het is woar. Ik heb vanof det moment toch eam de dinge uut mien handen loaten vallen en rustig de tied enömm det töt mie döar te loaten dringen.
In mien jeugd dreijen ik vöaral Bowie-muziek, det veul saams met Bowie’s nichtenrock-tied, wat mie een stempel gaf. Mar det kon ok döar de roze tuinbroek komm, die ik die joaren droege…
Bie de diploma-uutreiking droeg ik een mouwloos t-shirt met een print van Bowie d’r op. Ik heb íen kear op een podium een nummer ecoverd: Suffragette City van Bowie.
En ik heb altied ezegd det ik pas ging trouwen as Bowie kwam optreden. Nou, hij is d’r e wes. “Walking Denne” zungen mien breurs en zusters, op de muziek van de Jean Genie. “Walking Denne en zien vrouwtie löp met.” Det waren twee biezundere dagen. Want een dag vöar mien trouwen was ik met koningin Beatrix op pad in Salland. Het begint ollemoal verhalen te wönn van een oale man oaver vrogger. Nog eam en zie vroagt of Beatrix vöar of noa Juliana was. (“Ja en opa hef de premiers Kok en Van Agt ok interviewd.” “Wie?”)
Anouk deud in de Arena het vöarprogramma. Heel vaag had ik doar toen al wel ‘ns van e’höard. Anouk ging wieder. Achterof bleek det Arena-optreden de leste grote show van Bowie. Wegens hartfalen werd de tour doarnoa gecanceld.
Volgende wekke goa ik noar Groningen. De schouwburg stiet doar in het teken van het leam van Bowie, inericht döar Bowie zelf. Gelukkig heb ik de entreekaarten al een moand in huus, want det raakt doar noe natuurlijk compleet uutverkoch.
En vandage völle radio lusteren en vanoamd alle talkshows meepakken.
Denne van Knöldert
Meer foto's