Ik höaren twee leerlingen proaten oaver stageleerdoelen. Die mossen ze smart maken. Mar zie haa’n gin idee van hoe en wat.
Smart stiet vöar ‘specifiek, meetbaar, acceptabel, realiseerbaar en tijdgebonden’. De afkorting is dus een ezelsbruggetie. Mar een ezelsbruggetie vöar wat? Ik vreug het de leerlingen: wat ze d’r dan an hadden, an smart?
Wussen ze niet.
Misschien goed det de meester doar weet van hef, zodet die iets smarts kan bedenken vöar die kennisoaverdracht? Want smart is best wel handig.
Ok in het dagelijkse lea’m. Stel det ie wult ofvallen. Meestal lukt det niet, of mar ea’m, of earst wel en dan later hillemoal niet. As ie smart ofvalt geef ie earst heel specifiek oe einddoel an, dan koop ie oe een goeie weagschoale en vroagt oe of of ie d’r niet van an de anorexia raakt, dan goa ie kieken of ie niet te völle van oe zelf vroagt en ie sprekt of, wannear ie d’r kloar met bent.
Smart, gebruuk het straks mar met oe goeie vöarnemmens, al vanof det ie die bedenkt.
Mear afko’s: Lest höaren ik studenten proaten oaver het SEO maken van een site. Det bleek de site zo te maken, det Google oe makkelijker vindt. As ie stroatenmaker bent en ie hebt een site, dan wul ie det iemand die op ‘stroatenmaker’ zöch, det die dan oe site vindt. SEO, ik konne det mar niet onthoalen. Tut ik van de wekke höaren wat het betekenen: Search Engine Optimalisizer. Een optimaaldisearder vöar een zuukmachine. Noe ik wete wat het betekent, kan ik mie d’r iniens alles bie vöarstellen.
En toen kreeg ik ok nog een mail van de boekholder: “We moeten de WHK corrigeren want je bent voor de WGA vast eigenrisico verzekerd. Klopt dat?” Die heb beantwoard det ik niks van de vroage snappen. Heler antwoard, leek mie, mar det snappen hij dan wear niet…
Mooisten vind ik de ambtelijke afko VRI, det is een verkeersregelinstallatie. Vöar mensen die niet de hele dag achter een bureau regels bedenkt en controleart: det is een stoplicht.
Sommige afko’s bent zo ingeburgerd det wie niet iens mear weet wat ze voluut betekent. Probear mar ‘ns: Vara, VVD, ANWB, havo, rova. Het zol mie verbazen as ie ze ollemoal weet.
Wrum gebruukt wie eigenlijk afko’s? Ik kan het niet bedenken. Ieje?
Denne van Knöldert
Meer foto's