Home / archiefcentraal / denne van knoldert november

denne van knoldert november

Ofgelopen zoaterdag trök ik mie een warme trui an vöar klussen die ik buten te doene hadde. Mar die was al gauw wear uut. Foei toch wat zweten. En zundag leup ik in het Sallands Cross Circuit vief kilometer in mien zomeroutfit.

De hoge temperaturen brengt mie in de warre. Ik ben vöaral iedere kear wear verbaasd det al november is.

Zo lusteren ik zoaterdag noar de radio en höaren de discussie of Bohemian Rhapsody van Queen wear nummer 1 zol stoane in de top 2000. Ik denk ‘bent ze doar noe al mee bezig, zult wie earst de zommer iens ofwachten?’

Soms heb ik van die rare gevulens die niet klopt. Zo zat ik lest in de trein en vulen ik met mien rechter hand boam mien lijnker scholder. Op zuuk noar de autogordel. Raar toch? Vöaral ok ömdet ik in mien auto altied zonder gordel rieje.

Zoaterdag las ik ok det sjoemelsoftware het woard van 2015 ging won. ‘Noe al?’ dach ik ok toen wear. Sterker nog, det gevuul halen mie oaver disse column te schrie’m. Ik was van plan quasi-kwoad het Genootschap Onze Taal ‘ns flink de oaren te wassen wie ze dachen det ze wel nie waren, det ze noe al het woard van 2015 dörven te benumen. Töt ik beseffen det het hoog tied was met die eindliesten van het joar op de proppen te komm’.

Ik zit in het onderwies en het besef van winter stiet mie niks an. Want met kerst heb ik twee wekken vakantie. In de zommer een stuk of zesse, zeu’m, ik weet det niet iens precies, het bent d’r zo völle det ik niet op ien wekke kieke.

Half November. Dan mut ik mie toch nog ‘ns goed achter de oaren krabben. Doede wie Sinterkloas? Bent wie met de kerst bie haar of mien oalders? Wat zol d’r in mien kerstpakket zitten? En mut ik al bezig met goeje vöarnemmens?

Het bent gedachten die mie heel ongewoon oaver komt. En ik denk det det kump döar de hoge temperaturen. Ik stok de kachel eigenlijk nog niet iens. En det is lastig, want ik mut mien illegale holthok ofbrekken, mar ik komme niet döar mien holt hen.

Wat det betreft is ‘sjoemelsoftware’ wel een goed woard. Want tussen allerlei onzinregels döar sjoemelt wie de aarde noar de kloten.

Denne van Knöldert

Lees ook

Carolien Jonkman: Ome Jan

Mijn ome Jan is overleden. Hij was mijn peetoom. Toen hij ziek werd, is aan …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.