Home / archiefcentraal / denne van knoldert volkswagen

denne van knoldert volkswagen

Det het wetenschappelijk onderzuuk onbetrouwbaar is, is niet erg. Ik denk det as ie d’r echt onderzuuk noar doet, det bienoa gin enkel onderzuuk betrouwbaar is. In het proces van verzamelen van gegevens kun ie op völ te völle momenten fraudearen. Dus geböart det. Det politici en bestuurders verbaasd waren toen an het daglicht kwam det d’r gefraudeard was bie Volkswagen, zeg óf iets oaver de ofstand van zo iemand tut de maatschappij óf iets oaver zien acteartalent. De bazen bie Volkswagen stoat wél met beide biene in de maatschappij: gewoon de boel bedonderen en as het fout giet geliek een paar bazen ontsloane. Earst het vöardeel pakken van de belazerieje en vervolgens zo snel mogelijk schoon schip maken. Dan kun ie zo snel meugelijk wear op weg noar de volgende bedonderieje. Onze Haagse bestuurders en politici bent doar te elitear vöar. Die denkt det het land better wördt van twee Rembrandts en wringt zich via achterkamertjesvergaderingen in leugenachtige bochten richting ankoop. Iniens was d’r nog wel wat geld vöar op de begroting. Iedere kear ben ik wear verrast hoe die maatschappijregelaars het presteart nóg ongeleufwaardiger te wönn. Mooi vöarbeeld: ik had rijkssubsidie op zonnepanelen op het dak ekreeng. Mar ik zetten die panelen op de grond. Kon ik die subsidie allenig krieng as de gemeente doarvöar goedkeuring gaf. Det wol de gemeente niet, met het verrassende argument ‘want straks wul iederiene det’… Ik mos een nieuwe vergunning anvroang, leges betalen en toen was het goed. Feitelijk veranderen d’r niks, mar het papierwerk was toen wear mooi op orde. Hoe lange zollen die papierduwers doar vöar noar schoele wes weane? En wat vöar lessen zollen ze doar ehad he’mm?: Les 1: Wantrouw ze. Les 2: Geleuf ze niet. Les 3: Loat het niet uut de hand lopen. Les 4: Stel oe eigen baan veilig. En vöar wie de politiek in giet les 5: Loat in het verkiezingsjoar niet blieken det ie les 1, 2, 3 en 4 ehad hebt. Denne van Knöldert

Lees ook

Midzomerfeest Mariënheem weer de tent in

MARIËNHEEM – De kogel is door de kerk: het is de bedoeling dat het Midzomerfeest …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.