De neijmachine stiet bie oons niet zo völle mear op toafel. Vrogger was det een vertrouwd beeld. Mien moe koch dan op woensdag een paar meter spiekerstof en in het weekend kon ik e neeje broek al noar de disco in het parochiezaaltie.
Spiekerbroek met piede wiepen. Net as de mannen van Sweet en Mud. Mooi man. Bittie nichtenrock, doar was ik wel van. (Mar wel zonder glitter op de pakkies, want de kappeloan kwam ok altied eam kieken.)
Ik mos an vrogger denken – an de tied van thuus bie mien olders wonen – toen ik lest de noad löss hadde van een t shirt. Het duren toch een moand en heel völle lieve wöardties vöardet de neijmachine d’r an te pas kwam. Vanwege die lieve wichterties in Pakistan die vöar een habbekrats een neej shirt maakt, is reparearen biew vrouwlief gin liefhebberieje mear.
Het t shirt met de noad löss had echter extra wearde vöar mie. Ik had het ekocht in de 20 Century shop teengoaver Ground Zero in Manhatten New York, dus doar wol ik nog wel wat langer met rondlopen. Vöar de herinnering.
Mar ja, wat vöar mie een driefveare is, is vöar mien vrouw nog gin argument de neijmachine te pakken. Neej kopen is ok heel goedkoop.
Van de wekke reup ze mie d’r bie. Of ik de droad in de noald van de neijmachine konne krieng. “As ie dan det t shirt maakt”, begun ik vol goede moed. Mar toen ik zagge hoe klein det gaatie was woar die droad döar mos was de helfte van die moed gelieke vot. “En wat gif die neijmachinelampe weinig licht,” viel mie gelieke op. Mar an de lampe lag het niet volgens mien vrouw. Zo’n lampe bleek in iedere neijmachine te zitten, ok vrogger.
Noa vief minuten priegelen zat de droad iniens in het gaatie. Ik kon det vulen toen ik d’r an trökke, want ik zag gin verschil met al die kearen det ik ók dache det ik raak estökken hadde, mar dan bleek e d’r gewoon noast te zitten.
T shirt d’r onder, gaspedaal in etrapt en… droad d’r wear uut.
Het hef oons met zien beiden twintig minuten ekost, met behulp van drie leasbrillen en twee zaklampen woarvan d’r iene earst neeje batteriejen mos he’mm.
In november goa ik wear noar New York. “Koop dan mar wat t shirts extra”, zei mien vrouwe. Ik denke niet det de neijmachine nog snel wear op toafel kump bie ons.
Denne van Knöldert
Meer foto's