Benno Baksteen as woardvoerder van de vliegeniers, det is misschien wel de bekendsten. Mar Jeroen Bus as woardvoerder van Connexxion vind ik ok wel leuk. Van de wekke is d’r in Duutsland een asielkind Angela Merken enuumd, wat alenig nog mar de vöarname is.
En dan heb ie nog de familie Van Achter die hun dochter Lieve ‘nuumd hebt. Ok det is echt woar. Lieve werd dwarsfluitist…
Toen ik op weg noar de tourstart de honderd kilometer fietstocht onderbrak vöar een korte pauze in Voorthuizen was d’r öm 8.00 ’s monns alenig nog mar vis te krieng bie Visspeciaalzaak De Haan.
Een rare name, vund ok de serveerster, mar in Voarthuzen waren ze d’r al wel an ewend. Ik zeg: “dan kent ule natuurlijk ok wel een dier met mar één nier?” Nee, det wussen ze niet. Een halve hane…
Visspeciaalzaak De Haan. Ie vroagt oe dan of wat zo’n oprichter van de zake bezield in vis te goane.
Kiek, slöttelmaker Slot, doar ik mie iets bie vöarstellen. Holthakker Bos. En vöar al oe gazononderhold Meijer. Diëtistenpraktijk Edward en Fred (grappie van Höllenboer). Natuurfotograaf Kiekebosch is ok wel een idee.
Bakker Bart, Dokter Deen en zuster Suus bent ok wel grappig. Mar een hane die de visbranche in giet?
Kreeg ik van de wekke een deusie eier toe estuurd. Van Pluimveebedrijf Visscher…
Ik denk det ik die twee met mekare in contact goa brengen.
Denne van Knoldert
Meer foto's
