Home / archiefcentraal / denne van knoldert muzieieiek

denne van knoldert muzieieiek

Toen ik vrogger in de kroeg kwame en het cassettebandie was of elopen, reup ik altijd ‘muzieieieiek!’ Want onder het biljarten was det wel lekker, vöaral as ik mosse wachen töt ik eindelijk de böarte wear hadde. Kon ik lekker met de rubber achterkante van de keu meetikken.

In die tied ging ik al niet noar disco’s, want doar was de muziek altied en hinderlijk anwezig. Ik was van de wekke blie mie det te herinneren op twee feesten van verjoardags-jubilarissen. Ik tröffe doar het volk woar ik vrogger met noar het café ging en zag ok de mensen die toen al rechts of gingen noar de disco.

Sommigen had ik al lange niet mear ezene. Mooi geleangheid öm bie te proaten. Dach ik. Want van proaten is het niet echt ‘e komm.

“Goh, leuk oe hier te ziene.”

“Wat?”

“Det ie hier ok bent.”

“Ja, hmm. Leuk oe hier te ziene.”

“ Wat?”

Niet wat ie nuumt een goeje gelegenheid öm de leste twintig joar eam strak met mekare döar te wandelen.

Wat is noe de denkfout bie zulke harde muziek op feessies, of die noe in een zaaltie, in een tente of gewoon thuus bent. Det wie d’r op zit te wachten? Det het neafie eindelijk kans zut zien dure platenspöller professioneel te gebruken? Of det d’r altied wel een tante is die giet dansen (en det better niet kan doene)?

Het bent ollemoal redenen öm juust gín muziek te he’mm op zo’n feest. Hoe lange ik d’r ok oaver noadenke, een echt goeje reden vöar muziek kan ik niet bedenken. Wel goeje redenen öm gin muziek of hooguut wat achtergrondmuziek as onopvallend behang an de mure te verzörgen.

Gin muziek is goed vöar de proaterieje. En doar geef ie toch een feessie vöar?

Mensen met een gehöarapparaat kriegt alle geluud ea’m hard binnen.

Het neafie met zien platenspöller hef gin verstand van goeje muziek.

Die dansende tante… iederiene schaamt zich d’r vöar.

Ik wolle det terraseigenaren van de zommerfeesten ok zo wies wollen weane. Een akoestische violist, contrabas en zanger is mear dan zat. Echt, het volk kump dan liever noar oe terras en blif d’r langer zitten.

Heel iets achtergrondmuziek mag, mar dan allenig in de gevallen det ie vermoedt det d’r nare stiltes zult vallen. Dan is met de muziek mee-vingerdummen een redding.

Denne van Knöldert

Lees ook

Slotviering Pauluskerk; einde tijdperk

RAALTE – De Pauluskerk wordt op zondag 3 oktober officieel aan de eredienst onttrokken. Dat …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.