Home / archiefcentraal / denne van knoldert last minute

denne van knoldert last minute

Ik heb nog een wekke vakantie en wol mie een last minute (vöar mien va en moe: det is Engels vöar leste minute) boeken. Gekkenwerk is det. Al hillemoal as ie net as ik op het platteland woont en internetsnelheden hebt die mie deun denken an met de boot noar Amerika goane in plaatsen van met een vliegtuug.

As ie een last minute zuukt, krieg ie earst ollemoal reclame-sites van Google vöar eschötteld. Eam wieder zukend kom ie al snel töt de conclusie det de klant gin koning is, mar de verkoper. D’r is gin klantvriendelijk oaverzicht van alle last minutes. In plaatsen doarvan dringt de verkopers vöar hun reizen onder de andacht te brengen. En iederiene spölt vöar verkoper.

As ik een pot augurken wulle he’mm, goa ik noar de supermarkt. Die giet noar de groothandel. En die groothandel giet noar de augurkenfabriek, die op zien böarte noar de augurkenofslag was, woar de augurkenboer zien product verkoch an de hoogste bieder.

Mar in de reiswereld bent de augurkenboer, de ofslag, de augurkenfabriek, de groothandel en de supermarkt ollemoal anbieder ewönn. Schiphol, KLM, Harry van de Sunweb, lokale reisbureau’s… ie kunt oaveral oe reis boeken.

En doarmet is de definitie van ‘last minute’ onder druk komm te stoane. Vrogger was det een reis die ie vandage boekt vöar een vakantie van bie wieze van sprekken mo’nn, mar toch in elk geval binnen veartien dage.

Ik kwam last minutes teeng vöar in november! Mar niet vöar mo’nn.

En dan de priezen. ‘Al vanaf 485 euro’. Nog wel duur, mar loate wie die mar ‘ns anklikken. Wat ik ok an opties ingaf (verder weg van zee, niet dicht bie de oale binnenstad, gin huurauto), ik kwam niet in de buurte van die 485 euro.

En wat d’r mear van was: toen ik ’s oams met mien vrouw de opties nog ‘ns langs leupe, waren alle bestemmingen met mien interesse duurder. ‘Nog een kamer/stoel beschikbaar’ stund d’r en de pries was op eschroefd. Toen ik die bestemmingen ofgelopen weekend an de buren wolle loaten ziene, waren ze op hun computer wear goedkoper.

De smearzakken. As ie vanof een zelfde computer vaker noar een reis goat, weet ze det ie interesse hebt en wördt de pries vanzelf wat duurder.

Vöar de leste vakantiewekke heb ik mie thuus last minute een veranda in mekare timmerd met uutzicht oaver weiland.

Denne van Knöldert

Lees ook

Carolien Jonkman: Luisteren

Steeds meer mensen luisteren naar zichzelf en zijn zich bewust van wat er in hun …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.