Home / archiefcentraal / denne van knoldert uwv en tarotkaarten

denne van knoldert uwv en tarotkaarten

Het UWV had een cursus ‘tarotkaart leazen’ betaald an zeum meansen die noa de cursus gegarandeard een bane kreeng. Nou, nou, doar sprak Nederland schande van.

Mar wrumme? Het UWV betaalt uutkearingen, liefst zo weinig mogelijk, dus as ze d’r iene an een bane kunt helpen via een cursus van 1000 euro, dan zol ik ze’ng: doene!

Toch was d’r heibel in het land. Althans, ien van de sensatiekranten, het AD öm precies te weane bleus flink in de busse. De Telegraaf was d’r döarumme as de kippen bie te nuancearen. Zonder het AD ok mar ergens te numen leuten ze de UWV-baas zeng det drie Kamervroang duurder bent dat zeum cursussen.

Ofwel: kulnieuws.

En det is het ok. Het UWV helpt meansen an het werk en giet niet oaver wulk werk. Stel det het UWV wél oaver het soart werk zol goane. Dan krieg ie nog gekke discussies. Zollen ze dan ok een boekholdcursus niet mear meung vergoeden vöar iemand die hoer wul wönn? Of een sollicitatietraining vöar iemand die probeart bankdirecteur te wönn?

Het bent bedenkelijke beroepen. Net as ‘directeur ethiek’ die ze bie de NS kriegt. Wat mut die doene: de andere directeuren en managers zeng det ze de boel niet meung begappen? Ik zol zeng: de NS hef machinisten en conducteurs neudig. En een paar man die een bitte regelt det die weet wulke trein ze mut he’mm. Al die andere functies, doar mut het UWV gin geld in stoppen, as het ok gin geld in Taror kaart-leazen mag stoppen.

Det wie öm Tarot kaart leazen besmuikt mut lachen, hef te maken det het in hoek van helderziendheid en spiritualiteit zit. Det weet ik ok heus wel. Zelfs dan is d’r wat geks an de hand. Nem dit vöarbeeld: Annie Schreijer – de Twentse boerinne in het Europees Parlement – was kwoad op iemand die in de kraante zei det Mariakapelletjes hun langste tied wel ehad hebt. Dan is niet Schreijer gek, mar die man die det ezeg hef… De iene spiritualiteit is better dan de aander, zal ik mar ze’ng.

As ik doar zo oaver verder denke: mag het UWV dan wel een cursus vöar pastor, pastoor of dominee vergoeden? Ik zeg: gelijke monniken, gelijke kappen.

Denne van Knöldert

Lees ook

Rustpunt De lange Pier geopend in Lettele

LETTELE – Aan de Butersdijk in Lettele is sinds mei dit jaar een nieuw rustpunt …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.