Wie leaft in een mooie tied. Gemeenten goat gewone taal gebruken. Controles op onderwies goat vöartaan allenig mar oaver kwaliteit. De Welstandscommissie wördt of eschaft. En een baas van de banke hef e zegd det bankdirecteuren onzinnig völle geld verdient.
Kortom: het giet de goede kante op.
Taalgebruuk van gemeenten wördt better. Zodet wie snapt wat ze in die te grote gemeentehuzen ollemoal bekokstooft. Zo krig Duurzaam Heino geld vöar een butenkrane. Det schelt plastic flessies, zeg de gemeente die gratis plastic flessies weg gif bie sportevenementen.
Noe ze heldere taal sprekt, ziet wie die dingen. (En wrum kan die krane niet an de butenmure van het café?)
Of een boom an de Dorpsstroate in Heino die plat mut. Ömdet omwonenden anders niet werkt an een centrumplan. Pure chantage. Haa’n wie anders nooit an de weet ‘ekomm.
Controles van schoelen goat vöartaan oaver de inhold. Mooi!. Det hele Windesheimverhaal ging destieds oaver regels. Een stageverslag mos 5000 woarden weane. Een verslag van 3000 woarden was döarumme fout, vund een commissie vol domkoppen die d’r vöar doär eleard hadden. Oaver de kwaliteit van de stage ging het niet.
En de Welstandcommissie wördt ofeschaft. Ik zat vöarig joar nog bie zo’n professionele teeng-holder an toafel die het gin reet kon schellen wulke argumenten ik hadde. Hij wol gewoon wat te zeiken hemm. Een joar later bestiet zien werk gewoon niet mear.
En die Rabokjel: “As alle hoge bankmenearen 20% minder kriegt, giet d’r niemand weg” zei e. Doarmee haalt e een belangrijk argument vöar hoge salarissen weg. Öm met een schone lei te beginnen stel ik vöar op zuuk te goane noar de grens woarop die witte boarden-dieven wél goat lopen. En doar dan iets onder goan zitten.
As klap op de vuurpijl is de baas van de NS weg estuurd. Hij had wat erommeld bie Europese anbestedingen. Noe wördt d’r – weet ik uut ervaring – bie iedere Europese anbesteding wel erommeld, mar toch: hij kreeg niet iens een handdruk mee. Het was nog mooier ewest as menear in afwachting van het onderzoek in vöararrest mos. Want det doet wie toch met misdadigers?
Ik heb nog mar íen heilig huussie oaver: de earste manager die durft te zeng det het syteem van functionerings- en beoardelingsgesprekken (die allenig mar ehoalen wördt in bedrie’m die van belastinggeld bestoat,) of eschaft wordt omdet die gesprekken op gin enkele maniere biedraagt an… ja, an wat eigenlijk eigenlijk?
Denne van Knöldert.
Meer foto's