Home / archiefcentraal / denne van knoldert neeje tied

denne van knoldert neeje tied

“Ja, vriedag met zien allen noar de Grolsch Veste. Doar goa ik wel noar toe. Ik wul wel ’ns weten wat ze mie doar te vertellen hebt.” Ik zit in de trein op weg noar Almelo en dan tref ie altied wel wat belastingambtenaren in de coupé. Die hebt net eöard van massa-ontslagen.

“Nee, ik ben niet bange det ze mie d’r uutdoet. Mar 5000 ontslagen, ik vinn het erg dette wie det uut de krante mossen leazen.”

Gek is det, ik zol het erg vinn’ det mien bane straks misschien niet mear bestiet. Mar bie de Belasting vindt ze het erg det ze det uut de krante mossen leazen. Tactisch slim edoane van de Belastingen. As het oaver een afgeleide giet, kan het hoofdplan döargoane.

Ik wul het hier toch eam he’mm oaver het hoofdplan. 5000 Ontslagen. En 1500 jonge mensen d’r vöar terugge, die het neeje werken van de toekomst snapt. Det is in een notendop onze toekomst. Oaver tien joar bestiet – heb van höaren zeggen – zeumtig procent van het huidige werk niet mear in zien huidige vorm. De schoolmeester krig concurrentie van de beste digitale lessen van elders. Taxi- en vrachtwagenchauffeurs wördt vervangen döar zelfsturende auto’s. En mien internetbankieren nemt het accountantwerk én het invullen van de belastingformulieren oaver.

Wie hebt allenig nog wat meansen neudig öm de goeie dingen an mekare te knöppen: precies die 1500 jongere deskundigen teengoaver de 5000 oalderen.

En in de trein bleek an het gesprek het verschil tussen jong en old. Noa het gesprek oaver de ontslagen zei de ien teeng de ander:

Wat heb ie doar! Een ansichtkaartie?

Ja, de dochter van mien schoonzussie is joarig.

Leuk, een kaartie sturen.

Hmhm, is ok altied zo mar e doane. En dissent had ik d’r nog li’ng.

Och joa, ’t is een kleine muuite.

Joa, det meissie is wat autistisch.

Joa, joa, leuk.

En zie hef ok nog een jonger zussie.

Hoevölle postzegel mut d’r dan nog op zo’n ansichtkaartie?

Gek höar, die denkt dus det iederiene zo is, want die krig gin ander vöarbeeld.

Paar lieve wöardties d’r op en ie maakt zo mar wear een meanse gelukkig.

Ik weet nog niet zo zeker of die vriedag in de Grolsch Veste te höaren kriegt det ze meung blie’m.

Denne van Knöldert.

Lees ook

Oosterhuis zangdienst in Wesepe

WESEPE – Op zondag 19 september vindt in de Protestantse kerk van Wesepe weer de …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.