Home / archiefcentraal / denne van knoldert bekerfinale

denne van knoldert bekerfinale

Bie anvang van de wedstrijd zeg ik teeng mien moat: “eigenlijk is het toch wel gek det wie van voetbalsupporters altied allenig mar de negatieve dinge te ziene kriegt. Wat een gezelligheid hier in De Kuip.”

En zo was het ok. Ömdet de NS beslötten had werkzaamheden uut te voeren op de finaledag mossen wie oaver Schiphol richting De Kuip, mar ik heb mie gin moment verveeld. Vanuut de trein zagen wie volle viaducten noar bussen zwaaien en ín de trein was het een verbroedering van Noord en Oost Nederland. “Det de besten mar mag winn’, mien jong”, was het wieze woard.

’s Middags in de stad was het ok prachtig. Rondom het stadion tientallen politieauto’s, ME-bussies, agenten op een peard en weet ik wat mear. Mar in de stad leupen blauw en gruun gewoon saams de wedstrijd döar te nemm’. “Det de besten mar mag winn’, mien jong.”

In het stadion was de westzijde blauw wit. De oostzijde gruun wit. Twee muren van geluud die mekare respectvol öm de börte de kans gaa’m hun voetballiederen an te heffen. “Wie niet springt die is…” Het slot van die zinne ken ik nie en de supporters zelf denk ik ok niet, want mear dan vier woarden achter mekare, det is wel een dingetje. Het creatieve lied werd zowel an de grune as an de blauwe kante ‘ezung.

Mar goandeweg de wedstrijd ging ik begriepen wrum of het de raddreijers bent die het neejs haalt. Det is vanwege hun schofterig noadrukkelijke anwezigheid. Vöar ons op de tribune vöar neutrale gasten (woar Zwolle en Groningen döar mekare zat) zaten drie kloothommels de PEC-anhang te dissen. Duuzend man gezelligheid. Mar drie ellendige manneties, die op den duur toch alle andacht op zich wussen gericht. Ik heb d’r een kort filmpie van emaakt in de hoppe det ze herkend goat wönn.

Mar ok terugge in de trein. Dree leu uut Meppel waren zo dronkend det ze an ons vroegen wat d’r precies op de informatieborden stund. Of ze det zelf niet ko’nn ziene. “Ziene wel, mar leazen niet.” Zie drunken desondanks stevig döar, heffen liederen an, vertellen mekare hoevölle ze mossen “drieten en pissen” en staken d’r ‘gezellig’ een sigarettie bie an.

Wie bent toen mar in de earste klasse goan zitten. Doar zat de conducteur ok. Die deud of e van niks wus. En gelieke had e.

Denne van Knöldert

Lees ook

Waterschap geeft minder uit door corona en droogte

ZWOLLE – Waterschap Drents Overijsselse Delta (WDODelta) gaf vorig jaar bijna zeven miljoen euro minder …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.