denne van knoldert kwiet

Mien va was zien gehöarapparaat kwiet en ömdet de man 93 is, kun ie dan wel sprekken van een groot probleem. Hij bellen mie op vöar goeje road, mar verstund mien antwoarden niet.

Angifte doene bie de politie?

“Nee meneertje, dat doen we niet meer. Wij moeten boeven vangen.”

Ik zeg: “legalisear drugs en tweederde van de boeven is gin boef mear.”

Oom agent hef de rest van de dag in een huukie zitten noadenken.

“Aangifte doen? Dat moet bij de gemeente, staat heel duidelijk op hun site”, zeijen ze bie Beten Horen. Det wol ik metmaken. Want ‘site van de gemeente’ en ‘heel dudelijk’, die twee dinge had ik nog niet earder zien saamsgoane. Mien creatieve hersenhelft koppelt ‘site van de gemeente’ altied vanzelf an ‘niet kunnen vinden wat ie zuukt’ en an ‘heel völle geld’.

Mien creatieve hersenhelft kreeg geliek. Die button vöar angifte doene van verlöaren spul heb ik niet evunn. Op Google (mien va sprekt det uut als goochelen, wat het vöar hem ok is) vunn ik een site ‘verloren en gevonden’. Normaal heb ie het oaver ‘gevonden en verloren’, wat mie dan ok geliek wear an het prakizearen zet oaver hoe völle vergaderingen met dure managers d’r an die name besteed bent. Ik zie dan altied een notuliste vöar mie die denkt det de hoge heren vöar heur werkt in plaatsen van det zie de ondersteunende dienst is, en det die gewoon in het vergaderverslag de name gebruukt die zie het mooiste vindt. (Of ik een goeje name wusse vöar een informatiebuukie. Ik zeg: ‘informatiebuukie’. Het wönn IKB, in kort bestek. En iederiene had het oaver ‘informatiebuukie’)

Kortom: 93 joar, gehöarapparaat kwiet, angifte doene bie de politie mut digitaal bie de gemeente die doar dus op zien site niks oaver zeg. Dan kan ik mie vöarstellen det ie de wichter – die ie een heel leam lang goede road met ‘egeem hebt – noe iens andersömme öm goede road vroagt.

Noa wat goochelen op de computer kwam ik bie ‘verloren en gevonden in Roalte’. Wat ik ‘evunn hadde, wollen ze weten. En doarnoa kreeg ik een lieste van wat anderen ‘evunn hadden.§Mar eam verder zukend kon ik ok angee’m wat ik kwiet eraakt wasse. Doar vullen ik de vroang netties in, want pas noa angifte dekken de verzekering de schade.

Tut det ik bie de leste vroage kwam: “heeft u ook aangifte gedaan bij de politie?”

Denne van Knöldert

Meer foto's