Home / archiefcentraal / denne van knoldert correlatie

denne van knoldert correlatie

Mensen die mear tosties et, die hebt mear seks dan gemiddeld. Det was onderzöch. Det zol zo mar ‘ns woar kunn’ weane. Mar in de onderzoekswereld maakt ze dan verschil tussen causaliteit en correlatie. Is het ien een gevolg van het ander?

Tostie-etters kunt mear seks he’mm, mar det hoef nog niet specifiek te komm’ van die tosties. Vöar de zekerheid ben ik wel mear tosties goan etten. Ie weet mar nooit. Toch?

Mooi vöarbeeld van vergissing tussen causaliteit en correlatie is nachtblindheid. Onderzuuk had uut’ewezen det kinderen die ’s nachts met licht an sloapt, det die völle vaker nachtblind bent, dan wichter die in het donker sloapt. Mar advies het licht uut te doene giet niet helpen. Want wat bleek? Nachtblindheid is erfelijk. Olders van nachtblinde wichter bent zelf ok nachtblind. Döarumme leuten ze het licht an op de sloapkamer.

Terugge noar de tostie-etters. Ik ben d’r inmiddels achter det ik ze het lekkerst vinne met Oald Amsterdamse keze (met bedreigend völle zolt), een uienringetie en curry. Wieders is d’r niet völle veranderd.

Toen ben ik op zuuk egoane noar de bron van het neejs: noar het onderzuuk zelf. Det rammelen. An alle kanten. Bevobbeld ömdet ‘seks he’mm’ ondudelijk is. Is det met oe partner? Is det ok met andere partners? Of seks met oe zelf? Telt seks met de hond ok met? Degene die de vroagen kreeg, kon d’r zelf een dreij an gee’m. Net as op de vroage hoe vake of ie seks hebt. Det is typisch iets woar de goegemeente oaver lög. Ik zelf scheppe d’r niet te völle oaver op. Mar as ik de jongens van het voetbalteam zolle geleu’m, dan kwamen ze zundags agis niet an voetballen toe.

Toen ik zag det de enquête via Facebook edoane was, wus ik hillemoal zeker det wie hier met een slecht onderzuuk te maken hadden. Want de enquête-groep is dan völ te geselecteard. Wie zit d’r völle op Facebook? Jongere mensen. Wie et d’r de meeste tosties? Jongere mensen. Wie hebt d’r het meeste seks? Jongere mensen.

Tostie-etters hebt dus mear seks dan gemiddeld, niet ömdet ze tosties et, mar ömdet ze jonger bent. Ik kan oe verklappen det vrouwen met lang hoar ok mear seks hebt. Net as mensen met een spiekerbroek an. En luu die enquêtes invult via Facebook. Die ok.

Det in teengstelling töt mensen die plat proat.

Denne van Knöldert

Lees ook

Waterschap geeft minder uit door corona en droogte

ZWOLLE – Waterschap Drents Overijsselse Delta (WDODelta) gaf vorig jaar bijna zeven miljoen euro minder …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.