Home / archiefcentraal / denne van knoldert blind vertrouwen

denne van knoldert blind vertrouwen

Het is niet makkelijk blind te weane. Ie ziet de wereld op een heel andere maniere. Ie mut eigenlijk kieken met oe andere zintuigen. Roeken, luusteren, vulen. As schoelmeister in de Journalistiek heb ik doar wel ‘ns een oefening oaver edoane met studenten. Want as ie vöar de radio werkt mut ie bie de luusteraar beeld oproepen via zien oaren.

‘De brandwear blust de brand in een supermarkt’, is dan heel anders dan ‘vanof een döar de wind zwieberende hoogwerker probeart de brandwear de vlammen te bedwingen die döar gaten in het dak van de supermarkt wakkert. Zo te roeken is de brand ontstoane in de vleesofdeling. Het lik wel een mislukte barbecue’.

Dus ik met een groep studenten noar buten. Wat ziet ule? Ik had ze met de parkearplaatse op enömm woar mien oale Saab stund. Sommigen zaa’ng een mooie oldtimer, anderen zagen een old barrel, wear anderen zagen de redelijk neeje Volvo noast mien Saab.

De volgende studentengroep had een blinddoek ömme en blindenstokken met de parkearplaatse op. Bie mien Saab vulen ze an de rondingen det het een oldtimer was. De roest ontging ze. “Det zal een wel neeje, dure auto weane”, zei d’r iene toen e met zien stok op de Volvo tikken, woarnoa het alarm ofging. De noar buten gesnelde eigenaar kon det beamen. “Wat mut det hier met die stok op mien auto te sloane?”

Ik mos an det vöarval denken toen ik op station Roalte leup. Doar hebt ze van die schrikribbels bedacht vöar blinde mensen. Die loat oe kieken met oe voetzolen, en op de ien of andere maniere geef het getik met de blindenstok oe ok informatie. Ik kriege altied kriebels in de boek van die werkwieze. Ie mut toch ok mar blind vertrouwen op de stroatenmakers die die tegels anlegt.

En ik heb de indruk det det in Roalte fout is egoane.

Denne van Knöldert

Lees ook

Het levenswerk van Frits Offenberg

Raaltenaar al vele jaren bezig om volledige geschiedenis van gemeente Raalte en inwoners te documenteren …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.