Vanof ofgelopen zundag is de ophokplicht vöarbie. Biologische boeren meung de kippen wear buten loaten lopen. Oeps, ik ben een biologische boer. Een heel klein biologiosch boertie. Ik wus nie iens det d’r een ophokplicht was.
De ophokplicht was in’evoerd wegens de vogelgriep. De kippeties mochen niet buten ko’mm want de griep kwam letterlijk uut de lucht vallen: piel-enten en smiechten scheten het virus lukraak in het rondte. Gewone kippen zit bliekbaar altied al opgehokt. Noe biologische kippen ok.
Ik heb ok kippen. Zeum. En een hane. Bertus. Met mekare hebt ze d’r een boel lol van, hoewel ik wel merke det Bertus net as zien kippeties een bittie van de oale dag an het genieten is. Zie kriegt niet alle zeum iedere dag nog een böarte en eities le’ng schöt d’r ok manks wel bie in.
Minder vrolijk bent ze mie d’r niet van ‘e wönn. Bie het krieken van de dag maakt ze mekare, mie en de hele verdere buurte mooi wakker. En al vöar de zunne d’r het zwijgen toe dut vöar die dag, kroept ze gezellig teeng mekare op een stökkie in het kippenhok.
Gin gemeente-ambtenaar die weet det ik kippen hoale, gin veterinaire dienst die hier wel ‘ns is weazen kieken. Gin helikoptercontroleur die ze vanuut de lucht e’spot hef. Döarumme hebt die kippen van mie gin ophokplicht e’had.
Ik kan mie vöarstellen det d’r noa dit verhaaltie allerlei alarmbellen goat rinkelen op lokale, provinciale en landelijke overheden: “Bie Denne leupen de kippen lös!” De Stentor schrif een verhaal oaver schanduleuze lekken in het veiligheidssysteem. En de minister denkt an labels in oarlellegies en an een internationale site woar iederiene die kippen hef, zich mut registrearen.
VVD’er Gerrit Oplaat löt as woardvoerder van de kippenholders weten det het een schande is det biologische kippen buten meung lopen en det de plofkip völle better of is ömdet die standaard antibiotica an het drinkwater toe ‘evoegd krig. En of de gedupearde boeren gin schadevergoeding kunt krieng.
Intussen vleung de smiechten en de piel-enten weg, ging de vogelgriep vanzelf oaver en wördt d’r wieders gin maatregelen e’tröffen. Want de echte oplossing is minder kippen in de stal en det kan economisch niet uut.
De vergadertijgers van ons land stuurt netties hun declaratie en wacht geduldig op een volgende uutbraak.
En ik en mien kippeties hebt d’r ollemoal niks van in de gaten ‘ehad.
Denne van Knöldert
Meer foto's