Home / archiefcentraal / denne van knoldert klein schoartie

denne van knoldert klein schoartie

‘Hoe is het moet oe?’, vreug ik op de verjoardag van mien zwoager an iemand die ik twee kear per joar zie: op de verjoardag van mien zwoager en die van mien schoonzuster. ‘Och ik mag niet klaa’ng!’ En zo was het vöarig joar ok al. Toen mog e ok niet klaang, mar deud het wel. Iets oaver zien vrouw, wat precies wus ik niet mear.

Dus vreug ik d’r vöarzichtig noar, zo in de loop van het gesprek. Earst mar wat vrolijkers. Hij was noar Ajax-PEC ewest. “0-0, d’r was niks an. Ja, det heb ik wear…” Was e hillemoal noar de Arena ‘rene, spöllen zien kluppie 0-0. ‘Det heb ik wear’, Op zo’n verjoardag bent d’r altied wel wat mear die det zegt. As iemand zien glas ömme gooit, ömdat de postcodepries in de stroate was ‘evallen en ie haa’n gin lot, as iemand zien vrouw d’r vandöar is, as Ajax niet wint: ‘Det heb ik wear’. Ie maakt oe d’r zelf zielig met.

Höllenboer: “Luttenberg wol een tunneltie, mar zie kreeng verkearslichten.” Typisch geval van ‘det heb ik wear’.

‘Wrum zol ie het better he’mm dan een aander’, hef ok met ‘zielig’ te maken. Mar dan mear öm iene terecht te zetten die zich zelf zielig vindt. “Ik had mie van de wekke toch gezöar met de baas” of “foei wat wul mien vrouw altied dure kleare kopen. Ie mut d’r mar net teeng anlopen, zeg ze altied, mar die löpp zo völle in de stad, die kan nie aans as d’r teeng an lopen!” Teeng zo iene zeg ie: ‘Wrum zol ie het better he’mm dan een aander?’

‘Ik wens oe völle personeel’ is ok zo’n verjoardagsopmerking. Van een ondernemer die het zwoar hef an de zake en die det wul loaten weten. Niet ömdet e de gasten völle narigheid toewenst, mar ömdet e zichzelf – ja inderdaad – zielig vindt. Meestentieds ridt zo iene dan in de dikste auto van de parkearplaatse noar huus.

“Mar hoe giet het eigenlijk met oe vrouw?” dör’m ik noe wel te vroang.

“Och met mien vrouw giet het eigenijk wel goed. D’r zit allenig een klein schöartie in.”

Denne van Knöldert

Lees ook

KrachtvanSalland-cheque: extra budget voor lokale initiatieven

REGIO – Nieuwe aanvragen voor het 4D-budget van de provincie Overijssel zijn welkom tot 8 …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.