denne van knoldert wievie

In Roalte en Deamter kan de gemeente de hoogspanningskabels onder de grond krieng. Het rijk betaalt de helft van de kosten. De gemeente mut de andere helft ophoesten. Reden vöar de maatregel (belangrijker dan het geld) is det de kabels as ongezond betiteld bent.

Earst was recht onder de hoogspanningskabels wonen iniens gevoarlijk. Later werd ‘een bittie schuun d’r onder wonen’ ok as ongezond ezene. Die verandering in gevoar hef niet te maken met nieuwe stralingsinzichten. Ie hoeft d’r niet heel lange vöar döar te learen öm te begriepen det straling niet allenig mar recht noar beneden giet. De verandering in gedachte is een geldkwestie. De ontdekking det die kabels völle makkelijker onder de grond kunt, dan altied edacht, det gaf döarslag in aans denken. Zie dachen det die kabels in stikstof omhulst mossen wönn teeng de warmte. Bleek niet zo te weane.

Met het rijksgeld (dus det iedere Nederlander meebetaalt via de belastingen) kriegt betreffende gemeentes een kans uut duzenden. ’t Is noe of nooit nie.

Earst was d’r onder wonen niet ongezond, toen iniens wel, doarnoa was schuun d’r onder wonen ongezond. Zal ik een vöarspelling doene? D’r kump een tied det wifi hetzelfde meemaakt. Zogenaamd onwetend gooit wie het noe nog op het gemak van wifi, mar uuteindelijk zal het ziekmakend blieken. Ik heb al mensen höaren zeggen det een hoogspanningskabel kinderspel is bie wifi en det ie bie zendmasten al lijnen kunt ontdekken van dooie bomen, precies in de lengte woar de zendmast noar toe zendt… Het gevoar van wifi wördt pas onderkend as d’r een andere – liefst goedkopere – maniere ontdekt wördt.

Mien collega klagen lest oaver gebrek an wifi op zien werkkamer. Foei, wat vund e det lastig. Bie de koffie ging het oaver hoe det probleem op te lossen is. “Een wifiversterker op elektrisch”, gaf een andere koffiedrinker an, “dan kun ie goed op internet.” Hij had trouwens wel wat last van koppiene, was ‘m op evallen. “Met vakantie giet det altied oaver, mar as ik wear an het werk benne is ’t d’r met een halve dag wear.”

Öm die reden oaverweug hij noe ok zien wifi ’s nachts uut te zetten. Dan mos e sallandcentraal.nl mar niet mear in bedde kieken. “En doarbie, op de sloapkamer mut ik eigenlijk ok niet met wifi bezig weane, mar met mien wievie”, bedach e zich.

Kiek, det lik mie nog het meest gezond.

Denne van Knöldert

Meer foto's

LAAT EEN REACTIE ACHTER

Vul alstublieft uw commentaar in!
Vul hier uw naam in

Deze site gebruikt Akismet om spam te verminderen. Bekijk hoe je reactie-gegevens worden verwerkt.