Home / archiefcentraal / denne van knoldert mandarijnennettie

denne van knoldert mandarijnennettie

Bie Radar hebt ze ontdekt det ie een CE-keurmerk kunt krieng vöar een mandarijnennettie öm een verzakte baarmoeder met op te vangen. Wat mie doar het meest van verbaast, is det wule ons doar oaver verbaast. Bliekbaar bent d’r nog altied mensen die vertrouwen hebt in instanties die werkt met andermans geld.

Een CE-keurmerk, d’r bent zeumtig bureau’s die zulke dinge ofgeeft. Ie hoeft allenig mar te zeng ‘noa, dan probear ik het wel bie de concurrent’ en het is kat in ‘t bakkie.

Tuurlijk werkt die dinge zo.

Nog mear ongeleuf? Iran valt IS an. Zie dondert bommen op Iraakse steden. Amerika weet det, mar d’r is gin oaverleg tussen die twee landen. “Nee, zeker niet”, zeg een NOS-correspondent, “want det hef Amerika zelf e zegd.” Ja, ja. Oaver tien joar zal blieken det Amerika zélf de bommen an Iran leaveren.

Ie hoeft nie zo heel verre weg vöar ‘lachen gieren brullen’. Goa mar ‘ns op zuuk noar het bedrag det oe gemeente uutgeef an de eigen website. “Ömdet de burger d’r alles mut kunn’ vinden”. En det is net het probleem. Ie kunt op die websites juust niks vinn’. Die sites kunt te völle. Wrum? Ömdet de opdrachtgevende ambtenaar gin benul hef. Niet van de behoefte van de burger. En niet van priezen. Dus zo’n ICT-bedrief lacht zich slap, bedenkt functies die niet neudig bent en rekkent dubbele priezen.

Jammer.

De Russen gebruukt doping, bleek van de wekke. Goh. En de dopingcontrole is zo lek as een mandie. Tuurlijk, wie hebt vertrouwen namelijk in’eruild vöar transparantie. En doarmee ontstiet vanzelf ok het legioen van zich an de openbaarheid onttrekken en onder de oppervlakte operearen. Russen drogeart. Net as ieder joar de winnaar van de Tour. En Sven Kramer hef nie vöar niks steeds een andere trainingsroute.

En nem van mie ok mar an det ISO-controles, accreditaties en allerlei andere keurmerken ok ien en al bedonderieje is.

Mar weas earlijk: as zo’n nettie een kilo mandarijnen kan böaren die ie vanuut de kiste in het schap van de supermarkt in oe winkelwaang gooit en doarnoa via de kassaband in een bosschoppentasse terecht kump, as doarnoa een scheare neudig hebt öm het nettie kapot te krieng as ie ze in de fruitschale doet, dan mut zo’n nettie toch ok een baarmoeder kunn hoalen? Ik zol denken: nog wel een baarmoeder met baby d’r in!

Denne van Knöldert

Lees ook

Lezing over acupunctuur in Dorpshuus

HEINO – Herman Tichelaar verzorgt op woensdag 27 oktober een lezing over acupunctuur in het …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.