Home / archiefcentraal / denne van knoldert crossloop

denne van knoldert crossloop

“Maken ie een dansie toen ie oaver de finish kwam?” De man die mie doar oaver ansprak had het oaver Sallands Cross Circuit. Ik had doar vöar het earst van mien lea’m an met edoane. Een neeje wereld ging vöar mie open.

Een dansie. Nee, het zat anders. Toen ik oaver de finish kwam zei de speaker: “die menear hef zien rugnummer op de rugge.” Ja, det leek mie de beste plaatse vöar een rugnummer. Mar toen ik vöar anvang het circuit opkwam zag ik al det alle anderen het rugnummer op de boek haa’n. ‘Ben ik noe gek?’ vreug ik mie of en det bleek ik. Want met det ie start en finish oaver goat kan de speaker oe name allenig mar numen as e oe rugnummer kan ziene.

Dus met det de speaker zei det e mien nummer niet kon ziene, dreijen ik mie ömme. “Det leek wel een dansie”, zei die man dus, die mie doar oaver ansprak, “zo op de finishfoto”, voegen e d’r an toe.

“Finishfoto?”

“Ja, van iederiene die oaver de finish kump wördt automatisch een foto emaakt.”

“En dan bent d’r meansen die al die foto’s noa goat kieken?”

“Ikke bevobbeld.”

Een dag later zeg een andere man teeng mie: “ie haa’n nog agis nie zo’n gekke tied op de tien kilometer.” Ik had gin idee, ik had doar niet op elet. “Ja,” zeg e, “ik had earst onder Denne ezöcht, mar doar vund ik oe niet. Ie liepen onder ‘Salland Centraal?’” Hij had det de speaker höaren zeng toen ik det dansie maken op de finishlijn. “Best een goeie tied, een uur en acht minuten!”

“Hoe weet ie det?”

“Die tieden stoat online?”

“Mar hoe weet ze det dan?”

“Vanwege een chip.”

“Mar ik had gin chip!”

“Ie haan toch een startnummer?”

“Ja, een rugnummer det ik op de boek had mu’nn he’mm.”

“Nou, doar zit een chip in!”

Ollemoal nieuw vöar mie.

Van de pak ‘m beet 200 man die meeleup was ik drie noa laatst. Ik dach det het een gezelligheidsloop was en det d’r wel mear stoethaspels meedeu’n. Mar niet op de tien kilometer. “Eigenlijk vind ik tien kilometer te verre mar de vief kilometer was te late op de dag”, le’ng ik de buurman mien afstandskeus uut. “Ik renne mear wat döar het bos öm mien kop wat löag te lopen. Woarop de buurman zeg: “Is tien kilometer dan wel genog?”

Denne van Knöldert

Lees ook

Woningcorporaties regio Zwolle doen beroep op gemeenten: ‘Maak nieuwbouw mogelijk’

ZWOLLE – De negen woningcorporaties in de regio Zwolle doen een dringend beroep op gemeenten …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.