“We moeten er wel even op letten dat we straks op die hoorzitting niet vertellen welke informatie we allemaal al hebben.” Noast mie in de trein zit een kjel die de hele tied al irritant hard pröt in zien tillefoon. Mar toen e die zinne uutsprak kon e mie niet hard genog proaten.
Ik had ‘m al een paar kear an ekeken. Bittie met een kwoad en vroagend gezichte van ‘mut det noe zo hard’, mar tegelieke was ik de man an het polsen. Hij zat goed in de kleare, ging vake noar de kapper, en wachen met een neeje brille niet zo lange tut de verzekering het wear vergoedt.
Een zakenman kon het niet weane, want wie zaten in de trein. Mear een belangrieke ambtenaar. Niet heel belangriek, want wie zaten niet earste klas, mar wel reizend op kosten van belastinggeld, koffertje bie zich met vöar de burger nog geheime stukken, en mooi op tied noar huus, “want dan werk ik in de trein nog wat”. (Met die smoes was ik ok earder vot ‘egoane en det was mar goed ok, anders had ik die kjel en zien geheim niet ontdekt.)
“Als we meer weten over dat project, moeten we dat nog even achterwege houden.” Hij had de secretaresse an de lijn en die was bliekbaar bezig een höarzitting vöar te bereiden. Zo’n showzitting vöar de buhne met ollemoal woarden op een groot scherm die völle liekt mar niks zegt. Wie d’r niet bie in sloap valt kan zich better bedenken wat ze verget te vertellen dan wat ze vertelt.
Bie Nijverdal in de tunnel veul de verbinding eam weg. Doar had ik geluk mee, want toen ze mekare wear an de tillefoon hadden, vatten hij de bedonderieje nog eam dudelijk samen: “Bij die zitting over de bezwaren hoeven we nog niet te zeggen dat die kavels 2500 vierkante meter worden. Want dan maak je mensen alleen maar wakker.”
Pieter Winsemius scheut mie te binnen. As vöarzitter van een adviesraad van de regering zei hij det inspraak van burgers een grote schijnvertoning is. Ie mut het goed doene of niet doene, vindt Winsemius.
Die man noast mie in de trein hef det advies nog niet binnen ‘ekreeng denk ik. Mar wat ík binnen ekreeng hebbe is det ie op een höarzitting gin donder mut geleu’m van wat ze oe zegt.
Denne van Knöldert
Meer foto's