Ofgelopen vriedag fietsen een hoop mensen uut de regio teeng de Mont Ventoux op. Met zien allen noar boa’m en doarmet geld ophalen teeng kanker.
Het zol mooi weane as het ingezamelde geld niet allenig gebruukt wördt vöar onderzoek ter genezing, mar ok öm an de vöarkante helpen te vöarkommen ziek te wönn.
Ik heb de Mont Ventoux in het vöarjoar efietst. Mont Ventoux, de berg van de wind. Det heb ik eweten. De berg van de teengwind was het, van koale teengwind, van steeds koaldere teengwind, boam op de berg vröar het nog. Ik mosse flink döartrappen ja, mar zo’n heldendoad as iederiene steeds zeg, det was het noe toch ok wear niet.
Ie kunt de berg van drie kanten fietsen. De makkelijke kante, de iets muujlijker kante en de muujlijke kante. Mien moat regelt det soart kennis en alles wat ik dan doe is achter die klimgeit anfietsen.
Ik had mie natuurlijk ok wel wat vöarbereid. Niks sportschoelen en ingewikkelde drankies. Paar kear de Holterberg, de Lemelerberg en de Luttenberg oaver mos mar genog weane.
Dag 1 fietsen wie earst van Malaucene oaver de Madeleine noar Bedoin en vandoar verkenden wie via de muujlijkste kante de berg. Halverwege benne wie wear terugge fietst, want öm noe met het verkennen al gelieke noar te top te goane…
Dag 2 fietsen wie wél noar boam. ’s Monns een plakkie roggebrood met pindakaas, genog Vaseline in de racebroek en antrappen. Ik was mien drinkbidons vergetten, mar boam op de bult had mien moat nog wel wat sinaasappelsap gemengd met water oaver.
Dag 3 namen wie de kante die officieel nog dichte was, mar wie konn wel langs de sneeuwwallen hen. Pas bie de ofdaling ging het minder: wie mossen effen ofstappen öm bevröaren vingers te vöarkommen.
Dag 4 ging vanuut Sault, det nuumt ze de kante ‘die oe schoonmoe ok nog wel kan fietsen’. Een mooie ofsluting van vier dagen fietsen. Het was niet licht, mar het was ok niet zwoar.
Ofgelopen zommer heb ik ok twee daa’ng achter mien moat an efietst in de Belgische Ardennen. De Redoute en Côte de Rivage edoane, de Haussire, de Wanne, de Rosier en dan ok nog de Haute Levée op’ezwoegd, de Stockeu op noar het standbeeld van Eddy Merckx… Twee daa’ng Ardennen: völle zwoarder dan vier daa’ng Ventoux!
Denne van Knöldert
Meer foto's