Toen ze mie in de Stentor een kear interviewen moch ik het verhaal van te vöaren inziene, mar de fouten van de journalist halen ze d’r niet mear uut want de krante lag op de pers. Det soart laag bie de grondse journalistiek nuum ik sindsdien ‘Raymond Korse-ties’, vernuumd noar de rat ik kwestie.
Onder het mom van woarheidsvinding blieft ze d’r bie die krante vrolijk op lös lieng, feiten verdreijen en halve woarheden vertellen. Net zo lange töt alle abonnees weg bent, want díe bent níe gek!
Vief man op de redactie van 60.000 euro per stuk, met in het weekend freelancers die het werk doet en een fotograaf d’r bie… Nie gek det ie d’r zo völle abonnementsgeld vöar kwiet bent.
Ik kwam van de wekke in Moskou een prachtig Ramond Korse-tie’ teeng. In Nederland giet het neejs det alle Moskouse McDonald’s dichte bent as teengmaatregel op onze boycots. Dus ik loat mie fotograferen vöar een dichte Mc, kom ik twee stroaten verder een McDonald’s teeng die gewoon open is!
Det vreug öm uutleg. Die kreeg ik van een docent van de Moskouse schoele van journalistiek: “Dach ie noe werkelijk det wule hier alle Mc’s dichte doet? Det zol töt oarlog leiden! Nee, wie hebt d’r symbolisch drie dichte doane, zodet journalisten kunt schrie’m det ze ollemoal dichte bent.”
En zo stiet d’r in de krante det de hele hamburgerindustrie op zien konte lig. Een mooi ‘Raymond Korse-tie’. Met die Russische voedseltransporten noar de Oekraïne giet det ok zo. Det earste transport vol met voedsel werd vieftien dage lang kilometer noa kilometer verslagen. De twidden is nog vernuumd. Oaver het derde transport leas ie al niks mear. “Dus ok niet det d’r niks an de hand is,” leng de Russische docent mie uut. “De journalisten van jule zeijt twiefel. En ule denkt vervolgens allenig mar slecht oaver ons.”
Toen ik hem vertellen hoe bange wie in Nederland bent vöar een twidde koale oarlog, kwam e niet mear bie van het lachen. “Loat die journalisten toch niet van die onzin schrie’m”, biggelen hem de tranen van de wangen.
Ik zeg: “wie hebt in ons land een woard vöar det soart lulkoek, Raymond Korse-ties’. Hij hef mie beloafd det ok in Rusland te zullen invoeren.
Denne van Knöldert
Meer foto's