Home / archiefcentraal / denne van knoldert echo

denne van knoldert echo

Ik kwamme mie zelf lest teeng op Facebook. Wie haa’n met de Knöldert-familie een selfie emaakt en iene van het stel had det ‘epost. De likes waren niet van de lucht. As een viral ging de foto langs friends.

How, how, eam opneej. Want de gemiddelde plat-leazer is denk ik de weg hillemoal kwiet noa de earste zinnen van disse column.

Facebook betekent ‘smoelenboek’ zoas de juffrouw op de middelbare schoele had van haar leerlingen. Suckerburg maken det noa, öm foto’s van de mooiste meissies uut de klasse te delen met zien vrienden. Inmiddels zette wie ons zelf d’r op, met ons hele hebben en hoalen.

Een selfie is een foto maken van oe zelf. Vrogger vreug ie een passant of die een foto van de familie wol maken, met det iene mooie monument op de achtergrond. Sommigen deu’n det met de zelfontspanner, mar dan leup d’r altied net ientie vöar de lens langs. Teengwoardig heb ie d’r niet iemand anders mear vöar neudig.

Een ‘like’ is een vinkie det ie een bericht op Facebook ezene hebt. Zelfs as iene zien bien ebrökken hef, geef ie an det ie det leuk vindt.

Een viral is een virus. Ie plaatst iets op Facebook. Ik zie det ömdet ik in oe cirkeltie zitte en klik ‘vind ik leuk’ an. Dat ziet de mensen in mien cirkeltie het ok. Drie, vier klikken verder weet half Oaveriessel het.

Friends bent vrienden, mar in het Engels is det woord völle minder weard dan in het Nederlands. Een vriend is een vriend. Bekenden of pas oaverledenen bent iniens net iets mear vriend dan kennis, mar minder dan det wördt het woord ‘vriend’ niet weard. Een ‘friend’ via Facebook betekent hillemoal niks mear. Ie vinkt ‘joa’ an, en hoppa, wear een friend d’r bie.

En doar giet het mis. Wule deelt alles met friends, in de veronderstelling dette wie het deelt met vrienden. Det ie dronkend waren vöarig weekend. Det de Knölderties in Barcelona waren. Det de vrouw zwanger is.

Vrogger leut ik de echo van klein klein Knöldertie bie hoge uutzondering an de allerbeste vrienden ziene. Lest kreeg ik een echo-foto onder ogen ömdet ik friend – die ik gin vriend zolle numen – wasse van de friend van de zwangere vrouw. De zwangerschap was nog zo pril… as ie goed keken, kon ie de sperma nog zien zwemmen die te late bie de eicel was.

Denne van Knöldert

Lees ook

Oosterhuis zangdienst in Wesepe

WESEPE – Op zondag 19 september vindt in de Protestantse kerk van Wesepe weer de …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.