Home / archiefcentraal / denne van knoldert op de fietse

denne van knoldert op de fietse

In de vöarige dree columns nam ik ule met noar autopech op weg noar Frankriek. De leste dage van mien zommers vrie weane heb ik mie döarum veiligheidshalve op de fietse voart bewöang.

Ik keus vöar de route die Daniël Lohues bezingt in ‘Op fietse’. Het begun in Erica en het gung noar Sleen en Erm. Mien vrouw en ik staken bie het Bargerveen via seen buule zand de Duutse grens nog eam oaver. Wie reden vöar nog mear butenlandgevuul döar De Krim. En vöar de biezunderheid hebt wie ok Wijteveen bekeken.

Wijteveen. Lohues zag de aarde vanof de moane en dach det het hier wel vredig zol weane. Op de aarde zag e det de westerse wereld vrediger was. Hij keus niet vöar de VS, mar vöar Europa, binnen Europa keus e ok vöar het (mear vredige) westen en binnen het westen keus e vöar Nederland. In Nederland keus e vöar het (vredige) oosten en binnen het oosten keus e vöar Drenthe. In Drenthe keus en vöar Oost Drenthe en in Oost Drenthe keus en vöar e Wijteveen. Hij dach det het vrediger niet zol wönn mar in Oost Wijteveen mossen ze niks he’mm van die rare lui uut West Wijteveen. Lohues koch zich doar toen mar een raketijssie öm met terugge te goane noar de moane.

West Wijteveen. Wie hebt d’r bie de plaatselijke Coop een lekker ijssie ekocht. En vredig det het d’r was! D’r was houtdorp noast het voetbalveld en vanof onder een grote eikenboom woar wie uut de reang probearen te bliem, zagen wie de wichter noa de middagpauze noar hun hutten terugge fietsen.

De reang kwam met bakken uut de lucht. Mar de wichter van Wijteveen West fleuten zich vrolijk tussen de reangdruppels döar op weg noar wear een mooie timmermiddag. En ons passearend zeijen ze ollemoal ‘hallo’, ‘goejendag’ en vöaral ok ‘moi’. Ok het jochie det zichzelf een heel groot zwaard had e timmerd. Doar zat niks oarlogszuchtigs in.

De ene kear heb ie de auto kapot en zet een Franse garage oe of. De andere kear fluit ie döar het veen van Drenthe: wie dut mie wat, ik heb de bande vol met wind, nee ik heb ja niks te klagen. Ik zol hoast zeng: ja het mag wel zo.

Mar volgende wekke mut ik wear an het werk.

Denne van Knöldert

Lees ook

Ondergronds brengen hoogspanningsleiding Raalte stuk dichterbij

RAALTE/ZWOLLE – Het Platform Kabelvrij Raalte is blij met het besluit van de provincie Overijssel …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.