Home / archiefcentraal / denne van knoldert mooi kapot 3

denne van knoldert mooi kapot 3

Met een kapotte dynamo gestrand in het stadje Beaune in de Franse Bourgonje, besleut de verzekering det wie recht hadden op vervangend vervoer. Het werd een luxe auto woar ik mie nog eam an vergaapt hebbe.

Meedreijende koplampen, lampen die vanzelf angoat bie duusternis, achteruutriecamera en in plaatsen van een slöttel een drukknöppie vöar de motor an te zetten. Kost een hoop, ie hebt d’r niks an.

Mar vöar det wie die auto evunn hadden… Interhelp wol ons wel helpen, mar op zoaterdagmiddag een huurauto, muuilijk, muuilijk, muuilijk. Of wie dan niet better töt moandag een hotel konn’ pakken in Beaune. Ik mut zeng, het was een alderoardigst mooi plaatsie, mar ik had de wielrenfietse bie mie vöar dree kear de Mont Ventoux dus zie mossen mie op det moment niet ankomm’ met aquaducten uut de Medieval en wienpruveriejen bie kastelen op iedere ofslag op het platteland.

Fietsen wol ik. En teengoaver de Peugeotgarage van mongieur Champignon zat een Eurocar. Toen die noa een uur wachten öm 14.00 uur open was (wie waren al öm 03.00 uur vot erene zodet ik die zelfde dag de Ventoux al vaste wat konne verkennen) was ik de earste klante. De earsten van die middag, vanmo’nn had ‘e net zien leste huurauto toe’ezegd an een aander.

Hertz zat ok in de stad, een kwartier wiederop. Mar Hertz was op zoaterdagmiddag dichte en ik merken det ik in plaatsen van te zuken noar nog een andere autoverhuurder ik mear ömme mie hen keke noar wulk hotel ik zol uutzuken.

Mar mien vrouw had de moed nog niet op’egeem en die tröf in een winkelcentrum een jonge knaap die in Breda studeard had en ons met de auto van zien moe dwars döar de stad reed noar een autoverhuurder die ok dichte zat, mar doarnoa noar ‘Ada’ brach woar ze die luxe bak dus nog hadden stoane.

Ik was blie as een klein kind. Mar wat d’r bleef hangen van Beaune bent de verhalen van kapotte auto’s. Toen mien moat doar strandden zei een collega van hem: ik ken det plaatsie, de Peugeotgarage hef mie doar met een voiture de pannage van de tolweg ehaald. En toen ik mien moat het vertellen, zei die precies hetzelfde.

Zie hebt doar vier autoverhuurbedrieven. En iene was d’r op een achteloze zoaterdagmiddag zo mar uutverkocht. Zollen ze in die buurte auto’s kapot maken of zo?

Denne van Knöldert

Lees ook

Concert More Music Orkest in Okkenbroek

REGIO – Het More Music Orkest verzorgt op zaterdag 16 november een najaarsconcert in zaal …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.