Home / archiefcentraal / denne van knoldert mooi kapot 2

denne van knoldert mooi kapot 2

Hulp vroang via een SOS-poale an iene die allenig mar Frans kan. Of evoerd wönn met een panne-auto döar iene die allenig mar Fans kan. Bie een garage terechte komm woar de eigenaar allenig mar Frans kan… As ie autopech hebt in Frankriek, is het handig as ie zelf ok Frans kunt.

Wie waren langs de Route Paiage ter hoogte van Beaune gestrand met een dynamo-probleem. Ik had d’r wel belang bie det de garageholder langer dan twee dage oaver de reparatie deud, want dan betalen de verzekering vervangend vervoer.

Mar ja, hoe leg ik det uut. Ik heb twee joar Frans ehad op de middelbare schoele, en det was allebeide joaren in de earste klasse van de mavo. Doar höaren ik klasgenoten wel ‘ns met de meester in het Frans proaten en dan had ik gin idee woar ze het oaver hadden. Ik was verbaasd det ze mekare begrepen! En soms vreug ik mie of, of ze niet gewoon een brabbeltaaltie met mekare bedacht hadden, een soart geheimtaal zo as ik det as klein jochie wel ‘ns e doane had.

Dus probearen ik via een hoteleigenaar van een paar stroaten verder uut te loaten le’ng det ’t van tweeën iene was: of vandage (zoaterdag) repareren, of niet earder dan dinsdag kloar en ze’ng det zoaterdag gewoon een werkdag was. Want zonder vervangend vervoer zaten wie nog töt noa het weekend op’eslötten in het overigens best mooie Beaune, mar wie hadden andere vakantieplannen.

Ja, nee, monsigneur le reparateur had het hillemoal begrepen. Dus toe e Interhelp an de lijn had zei e as earste: nee, de garage is vandage niet open… Mar gelukkig leng e doarnoa uut det e mien Opeltie niet vöar woensdag wear an de proat zol krieng.

Tied öm de apart reizende familie te bellen woarmee wie saams een huusie ehuurd hadden an de voet van de Mont Ventoux. Det wie gestrand waren en noe in Beaune zetten. Ja, det kennen ze wel. Doar hadden ze al iens e stoane met autopech. Iets met de accu. Wat later de dynamo bleek te weane. Zie waren zo goed ehölpen döar een garageholder die langer dan twee dage oaver de reparatie deud, woardöar ze een vervangende auto mochen he’mm vöar de rest van de vakantie.

Toeval bestiet niet…

Lees ook

Sportakkoord Olst-Wijhe versterkt samenwerking verenigingen

OLST-WIJHE – Het Rijk nam met het landelijk sportakkoord onlangs het initiatief om meer mensen …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.