Home / archiefcentraal / denne van knoldert wk

denne van knoldert wk

Ik was zundag an het zeppen tussen wk-neejs, Tour de France-fietsen en Formule 1-botsingen, toen ik iniens midden in de finale van Wimbeldon veul. Ik wus agis niet det ze doar al begunn waren.

Wat een sportzomer.

Ik weet niet hoe of det ule het vergiet, mar ik heb mie de earste wekken van de vakantie gin plekkie op een camping gereserveard, mar een plekkie rechts veur an op de banke. Bier en chips binnen handbereik. De gordienen wat dichte. Want det is wel lastig met die zommersporten, het is völle oaverdag en dan stiet de tillevisie niet al te gunstig in de huuskamer.

Helaas wördt ie d’r niet mooi broen van, van al det tillevisiekieken, want det doe ie natuurlijk bie vöarbaat binnen. Ik heb de tv al wel een kear buten near ezet, mar ik höaren toen de commentator zeng det d’r een heel smearige oavertreding emaakt was, die ik hillemoal niet ezene had. Sindsdien zit ik hele dage binnen.

Zundagmiddag heb ik trouwens wel eam de kans ‘egrepen noar buten te goane. Eam een terrassie pikken. Mar toen begun het te reang. Wie kreupen ollemoal gezellig onder een parasol, woarbie ik noast een vrouw kwam zitten die het oaver voetballen ging he’mm.

Det is wel een groot noadeel van zo’n WK. Eredivisie, bekervoetbal, landenteams, af en toe vertel ie oe vrouw vöar het fatsoen wat het verschil is (‘kortste weg noar Europees voetbal’) en leg ie uut van “ja, det is heel belangriek”, (met een pfff, van ‘snap ie det dan niet’, terwijl ie noar een vöarronde van de vöarronde van de Championsleage kiekt). En dan heb ie het rijk wear allenig. Mar bie het WK kik oe vrouw met.

En dan zit ie dus in de reang op het terras onder een parasol en dan zeg zo’n vrouw: “’t Is wat hè, die Louis van Gaal?”

“Een stunt ja. Mar ik vund zien standpunt oaver de trainbaarheid van penalty’s nemmen nog völle interessanter!” Want as ik oaver voetbal kan proaten, dan proat ik oaver voetbal.

“De wat…?”

“Ie kunt spanning en stress van een penalty niet trainen, mar ie kunt wel vöarof een hoek kiezen en dan balvast op die hoek trainen.”

Dan haakt zo’n vrouw toch wear snel of.

Zundag is het WK vöarbie. Gelukkig bent Eagles en PEC al wear an het trainen.

Denne van Knöldert

Lees ook

Carolien Jonkman: Ome Jan

Mijn ome Jan is overleden. Hij was mijn peetoom. Toen hij ziek werd, is aan …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.