Zo onderweg met de auto noar Zuud Frankriek lear ik nog wat van de technische kante van een auto kennen. En gelieke kreeg ik een kiekie achter de schermen van noodhulp. Ofwel: ik had autopech.
Ergens tussen Metz en Nancy begun het rode lampie van de accu te branden. Het schrikeffect – döar mien lichaam vertaald met een signaal det een korte siddering in het boavenste deel van mien ruggegroad teweeg bracht – kwam tegelieke met det op de CD in de auto Queen in zien Bohemien Rapsodie ‘it send shiffers down my spine’ zung.
Toeval bestiet niet.
Bie Dyon ging ok het lampie van de ABS branden. Ik weet nooit wat det precies is, mar an het sturen te vulen, kon het wel ‘ns iets met de stuurbekrachtiging te maken hebben. Toen de CD begun te haperen en medepassagiers dachen det het an de CD lag, mos ik hun mededelen det ik vrezen det de accu het begeven had en det langzaam mar zeker allerlei onderdelen in de auto uutveulen.
Paniek
“Stopt de auto dan iniens.”
“Nee, hij zal allicht uutrollen.”
Mar toen ok het lampie van de airbags angaf det ze niet met mear met zollen doene bie een ongeluk ben ik een parkearplaatse op erene. Italiaanse vrachtwagenchauffeurs leggen mie doar uut det het de dynamo wel zol weane, mar det ik ok zonder stroom wel verder konne. Vanof de accu van ie van de tien auto’s die ze op hun trailer haa’n kregen ze mien Combo wear an de proat en vot gonk het wear.
Driehonderd meter verder pruttelen de motor nog ien kear en toen was het of elopen. Niks niet riene zonder elektrisch. Ik had de handremme gebruukt en die hef vermoedelijk elektrisch neudig öm wear uut te goan.
En zo vreug ik eam later via een SOS-poale an iemand in een hulpcentrum die allenig mat Frans kon, wat ik noe mosse doene. Nou, met een half uur zol een pannage-voiture – een pechauto – ons ophalen. Interhelp vund det een goed plan en die advisearen mie hullie terugge te bellen as wie bie een garage waren. As het twee dage duren vöar de auto weer deed, vergoeden zie alle kosten!
Det wie doarnoa met de transportauto döar een zie-uutgang de tolweg ofgingen, was dus de earste winst van de vakantie.
Denne van Knöldert
Meer foto's