Home / archiefcentraal / denne van knoldert dreuge worst

denne van knoldert dreuge worst

Ik krege een boel reacties op mien stukkie van vöarige wekke oaver Freecell en de verslaving die ik doar an hebbe. ‘Better dan an de drank’ was een reactie. Opvallend völle ok: ‘ik spöll ok völle Freecell, mar det is toch gin verslaving?’ Nou, advisear ik die persoon, probear d’r dan mar ‘ns een dag of wat of te blie’m.

Net as met drank, niet verslaafd, mar in paniek as de wienflesse löag blik.

Freecell is as kaartspel een verslaving, mar ik geleuve det het mear een verslaving an de computer is, of better: een verslaving an digitaal. “Ik goa vöar ik goa sloapen ok altied eam op internet. Eam Facebook langs lopen,” zei iene. En een ander: ”As ik wakker wörd, is nu.nl het earste wat ik bekieke. Niet det d’r ’s nachts meestal wat geböart wat ik de volgende dag direct mutte weten, mar het is mear…” Inderdaad, het is mear een soart van verslaving.

“Och, verslaafd, het is mear een tick, een lichte afwijking die gerelateerd is an het autistisch spectrum” leggen een kennis van mie uut die d’r vöar döar eleard hef. En hij gaf mear ofwijkingen: det oe de roetenwisser altied beneden mut weane, precies tussen twee hectometerpöalties in. En de trapper altied ien kear rond etrapt mu’nn he’mm as ie wear op een witte streep uut komt.

Toen ik det thuus an de ontbijttoafel vertellen, zei mien zunne det hij ok zoiets had: “as ik het zebrapad oaverstekke mag ik allenig mar op wit komm’, want doar tussen stiet het in brand en bent d’r ollemoal haaien.”

Ik zeg “in brand ėn haaien?”

“O nee, det van die haaien is ok niet zo.”

“Mar hoe heb ie det dan?”

“Doar ben ik bange vöar bie een vöarrangsweg. Met die haaientanden…”

Ok een mooie reactie was van die kjel die mie vertellen det e – echt woar – niet van de dreuge worst kon ofblie’m en det e döarumme altied apart noar de supermarkt ging öm det te kopen. “Nog een hele klus”, le’ng e mie uut, “want mien vrouw dut altied de bosschoppen en die wul niet det ik dreuge worst ette. Döarumme heb ik altied contant geld in de portemonnee, want met de pin betalen is gin optie. Dan wul zie weten wat ik in de supermarkt dede…”

Denne van Knöldert.

Lees ook

Inschrijving VechtdalTrail in Ommen geopend

OMMEN – Het was lang spannend, maar met de aangekondigde versoepelingen vanaf 30 juni lijkt …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.