Vöar een sollicitatietraining zei de kjel vöar de klasse det ie eventuele stopwoarden mut oflearen, eventueel. Eventueel, het bleek een stopwoard vöar den kjel.
As ie doar as klasse achterkomt raak ie al gauw an het meeturven. En van meeturven kump de slappe lach. “Wult ule eventueel vertellen wrum d’r zo’n lol is doar in die hoek?” Nou, doar hadden wie eventueel niet zo völle zinne in, dus wie redden ons d’r uut döar te zeng det wie op youtube een grappig filmpie keken. Of wie eventueel het fatsoen konn’ opbrengen niet met andere dinge bezig te weane as hij lesse gaf. Eventueel.
Wilfred Genee van VI-TV hef zelfs een hele stopzínne. “En dat soort dingen allemaal”, zeg die nog al iens. Det doet ‘ze’, as ze mar íen vöarbeeld weet, en det doet ze za’k mar zeng. Als ze Hansie Hansie wear kwoad hebt met de beelden det e zien jassie weggooit, det e dan zeg: “en dat soort dingen allemaal.” Terwijl Kraay feitelijk zien jassie mar íen kear weggooien.
Mien moat zei lest noa een gemaakte ofspraak: “okeuj”. Ik dache det e oaver zien tonge stroekelen, det e gewoon oke bedoelen. Mar toen wie een wekke later precies dezelfde ofspraak maken (wie tennist altied op dinsdag öm 19.00 uur, vrogger stunn’ wie dan gewoon op de bane, mar öm ons jong te vulen, sture wie teengwoardig earst een mail, zette wie een post op facebook, stuurt een app en belt d’r dan ok nog eam achter an) eindigen det gespek ok wear met okeuj. Dus det was gin bekkenbrekker.
Toen ik lest werkofspraken met de baas maken, höaren ik die, toen hij het gesprek wol beëindigen, ok ‘okeuj’ zeggen, in de zin van ‘Knöldert, ie kunt wel goane’. En toen ik mien vrouw vreuge wat extra oale keze te kopen vöar kommend weekend kreeg ik ‘okeuj’ terugge. Mar zie vergat de oale keze… Nee, det leste is gekkigheid.
‘Gekkigheid’, det höar ie ok völle. Krig iemand op een verjoardag de colaflesse niet open en dan zeg d’r iene: ‘zal wel een homo weane’. Blik d’r op det feest een homo te weane die net uut de kaste ‘komm is… Dan probear ie weg te komm met ‘gekkigheid’.
Kan iemand mie eventueel uutleng woar ‘okeuj’ en det soart dinge ollemoal vandan komt? Of zol het gewoon gekkigheid weane.
Denne van Knöldert
Meer foto's