Quote – det blad det dieven gebruukt öm de huzen van de riekste mensen van Nederland vinden – had lest boam Wassenaar een drone loaten rondvie’ng öm foto’s te maken van achtertuinen. Van heel grote achtertuinen.
De hoofdredacteur leng op de radio uut det det niet strafbaar was en det d’r niks an de hand was, boamdien bent die foto’s ok via GoogleMaps te bekieken. En zo had Quote mooi wear de andacht. Is altied goed as de Quote top 50 wear uutkump.
Mar het brach mie an het prakkezearen. Wat kan d’r dan ollemoal met een drone? In het neejs höaren ik al van de nieuwe pizzabezörger. D’r wördt wat lachwekkend oaver e doane, zo van ‘dan heb ie wel mooi koale pizza’s as die drone oaver is’, mar ik zie det anders.
De pizzabakker hef goed geïsolearde pizzadeuzen met navigatie d’r in. Vanwege een scan weet de drone wukke deuze hij op mut pakken en woar die noar toe mut. Een minuut vöar landing wördt d’r een app estuurd noar de besteller die dus op tied bie de döare stiet te wachten.
Volgende stap is det die drones iets zwoarder spul an kunt, dan pruts ie d’r een stuultie in en ie hebt een vliegende auto, zoas twintig joar terugge in die tekenserie ‘The Jets’. Botsingen wördt met programmatuur vöarkommen.
En wegens het succes van de drones is het goedkoper een pakketie met een drone te vervoeren dan met bussie of vrachtwagen. Eam verder en ie hebt gin asfalt mear neudig.
Handig die dinge, ok vöar persfotografen. Die stuurt een drone noar een voetbalwedstrijd, zit thuus op een scherm noar zien camerabeelden te kieken en klikt op het goede moment. Live uutzenden kan natuurlijk ok!
En toen ik van de wekke van de fietse veul ömdet ik wegens de combinatie ‘gin koplampe’ en ‘duuster buten’ van de weg of e raakt wasse, bedach ik mie nog een functie. Die drone kan mien persoonlijke fietslampe weane! As ik ‘m dan wat hoger in de lucht inzette, is e metiene mien lantearnpoale! Hoef ik gin licht mear op de fietse en hoef de gemeente gin lantearnpoalen mear an te leng.
As zo’n drone mien bosschoppen dan ok nog böart, dan benne wie wat mie betreft woar het weane mut.
Gemak dient de mens.
Denne van Knöldert.
Meer foto's