As ie op de lagere schoele met gymnastiek mochen kiezen wat ie ging doene, wat keus ie dan? Juust: apekooi. Ik mos doar an denken noa wedstrijd nummer vieftiene die ik disse wekke van het WK zag.
Gymnastiek. Hebt ze det eigenlijk nog wel op de basisschoelen van noe? Ie zollen denken van niet. Ik lasse lest det de gemiddelde taille-ömvang van de jeugd in twaalf joar tied met vier centimeter toe enömm was. De oplossing doarvöar was gelieke an de oarzaak: de oong sluten vöar het probleem. Zie hebt de schaal zo veranderd det de jeugd nog steeds dezelfde moate hef, mar wel een grotere broek…
Apekooi. Wrum bent doar eigenlijk gin wereldkampioenschappen in? Vermoedelijk omdet det te gevoarlijk is. Of zol het gewoon te slecht in beeld te brengen weane. Doar kunt sporten ok onder liene. Nem toafeltennis of volleybal. Ok al kan het spectaculair weane, as de tillevisiecamera d’r niks met kan, wördt het nooit wat.
Wat det betreft hef voetbal geluk. Ie kunt het zo goed in beeld brengen, det zelfs een saaie wedstrijd nog mooi is. Det is echt een geluk, want weas earlijk: eigenlijk mut ie oe zelf een loser vinn as ie twee kear drie kwartier noar een wedstrijd hebt ekekken en het is 0-0.
Wrum is voetbal dan toch nog mooi bie zo’n uutslag? Ömdet ie oe altied wel ergens kwoad ömme kunt maken. De spits die blundert. De scheids die een butenspel negeert die oe vrouw zelfs nog zag. De commentator die d’r wear niks van begreep. De teengstander die rood mos he’mm terwijl precies dezelfde anslag van iemand van oe kluppie natuurlijk niks was…
Ik vind het prachtig det de camerabeelden teengwoardig precies loat ziene wat d’r an de hand was. Mar ik ben zwoar teeng het gebruuk van die beelden bie definitieve beslissingen. Voetbal wördt dan een te schone sport. De emotie is dan vot, net as bie hockey. Dan is d’r niks mear an.
Zelf sporten doe ik vöar de sport. Mar sport kieken doe ik vöar de emotie. Ik wulle kwoad wönn op de banke, kunn vloeken, mar ok mien vrouw öm de hals vlieng bie een mooie goal of bie onverwacht uut ’eschakeld wönn. En ik wulle d’r op mien werk bie de koffie met mien collega’s een andere mening oaver kunn hemm.
Voetbal, een saai spellegie, mar o zo spannend.
Denne van Knöldert
Meer foto's