Home / archiefcentraal / denne van knoldert moskou 3

denne van knoldert moskou 3

De wereld wördt d’r een stuk makkelijker op met internet. Ik ben nog vanuut de tied det Rusland niet in de reisgidsen stund, de stad is vandage de dag zo open as mar kan. En hillemoal internet-bestendig.

Mooiste vöarbeeld vunn ik het couchsurfen. Det is uut eprakezeard döar een slimme reiziger die van A noar B gratis onderdak zöch en Jan en alleman opreup de banke (couch) as sloapplaatse an te bieden. Det idee sleut zo an, det e d’r werk van maken en noe is d’r op internet een leamdige handel van vroag an anbod.

Vroag is al lange niet mear allenig de banke öm op te sloapen. D’r is zelfs anbod bie ekomm’. Zo beud iene Paul zich an as professioneel rondleider, boam en onder de Moskouse grond, woarbie hij noadruk zol leng op het leam vöar en noa de val van het communisme.

Het was magistraal. Zo leut Paul ons het KGB-gebouw ziene, en liet ons boam de grond oaver een tunnel hen lopen noar een ander gebouw van die geheime dienst, woar döarhen 50.000 gevangenen per joar of evoerd, vermoard en via een andere vöardöare of evoerd werden. Det is 200 per dag, as ie in het weekend vrie bent.

Paul was super digitaal. “Noe zut het er zo uut”, wees e noar het pand, “vrogger zo”. En dan leut e foto’s en video’s vanof zien Ipad ziene.

Paul kossen ons niks. “Ik mut nog een paar rondleidingen gee’m en dan ben ik gediplomeard”, zei e op de couchsurf-site. In werkelijkheid – zo bleek – gokken e op fooi en kon e via die weg völle mear verdienen dan zien moaten woarvöar ie een vast tarief mut betalen.

Noa een lange enerverende wandelng boam de grond, nam Paul ons mee de metro in, want die stations bent stuk vöar stuk paleizen woar machtig völle marmer, köpper en brons in is verwerkt, verlicht met de mooiste kroonluchters. Onder de grond ben ie zo de weg kwiet en Moskou hef mear dan 300 stations, mar doar hebt ze een app vöar. Zonder probleem ging het van A noar B.

Doar krieg ie honger van. Dus toetsen ik op een andere app in det ik typisch Russisch wol etten, niet te duur en vöaral ok een bittie in de buurte woar ik op det moment was. ‘Ping’, zei de smartphone, 300 meter wiederop kon ik terechte.

Denne van Knöldert

Lees ook

Excursie bij het Rozendael

HEINO – Agnes Neimeijer verzorgt op dinsdag 3 augustus weer een avondexcursie bij landgoed Het …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.