Home / archiefcentraal / denne van knoldert met de busse

denne van knoldert met de busse

Ik stund langs de provinciale weg op de busse te wachten. Ik had de busse bie het station net ‘emist en in plaatsen van stom wachten ben ik de volgende busse al mar vaste wat vöaruut elopen.

Bie die bushalte – zonder hökkie, en toch rea’ng ‘t – gaf een digitaal paneel an det ‘de verwachte vertrektijd’ van de volgende busse oaver neeng minuten was. Ömdet de vertrektieden d’r noast hingen, konn ik det zelf ok wel uutrekkenen, mar mien oog veul op het display ömdet ze as busse een ofbeelding gebruken, uut de tied det de computers nog mossen wörden uut’evunn.

Doar kan ik mie de kop dan oaver brekken. Is d’r iene in een neejerwets systeem bezig en dut e alle muuite öm d’r een old plaatie van een busse bie te vinden. Wrum? ’t Is net as die oaverstekkende huppelende kinderen op een verkearsbörd bie een zebrapad. Wichter ziet d’r teengswoardig heel aans uut.

Mar goed, oaver vier minuten wönn de busse verwacht. In gedachten verzunken weane, verdrif de tied bliekbaar.

Toen mien openbaar vervoer d’r mos weane, stund d’r det de busse nóe verwacht wönn. Mar verwachting en werkelijkheid bleken verschillende dinge. En het display was niet bie machte die verandering döar te gee’m.

In de te late busse kon ik eam later lekker disse column schriem, zonder op de weg te hoe’m letten en zonder wieder nat te reang. Mar ik bleef met de vroag zitten wrum of det display bie de bushalte stiet.

Mie informeren oaver de verwachte ankomsttied is pas interessant as die tied anders is dan op het schema det d’r noast hangt. Want noe kunt ze d’r ok wel een wekker nearzetten. Of hillemoal niks, want iederiene hef zelf de tied wel bie zich.

Hoe zol zoiets bedacht wönn? Döar een druk-druk-druk-manager in een tussenloage van de baas en de mensen die echt an het werk bent, stel ik mie dan zo’n bittie vöar. Haltes met bushökkies hebt wél een display det de werkelijk verwachte tied angif. De busse lik dan zelfs bie vertraging altijd precies op tied! “Nou, dan doet wie een iets simpeler display bie haltes zonder hökkie”, zeg de manager . De baas denkt det e een goede managar hef, en ok het werkvolk kik wel uut commentaar te leaveren.

Dan stoat d’r twee monteurs zo’n display op de hangen en zeg de ien teeng de ander: “Kunne wie d’r niet net zo goed een klokke near hangen?”

Lees ook

Zozijn ‘dondersblij’ met nieuwe bus

Broers René en Harry Nijboer betaalden bus vanuit eigen portemonnee RAALTE – De nieuwe bus …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.